Chief Minister-in project 3 a tlangzarh: Duhsak bik neih rem kan ti lo - Duhoma

Nimin khan chief minister Lalduhoma chuan Thenzawl Golf Course Auditorium-ah Silk Samagra-2 hmanga Sericulture dept. hmalakna thar project pathum a tlangzarh. Chief Minister chuan, ruling party nih vanga duhsak bik neih rem an tih loh thu a sawi.

Chief Minister chuan, muga silkworm chu India ramah chauh a vulh theih tih sawiin, "India ramah pawh NE India-ah chauh kalpui theih a ni. Assam hian an thar ṭha ṭhin. Mah se, nipui laiin Assam pawh a lum tawh lutuka, tlangram an rawn melh ṭan. Mizoram hi a ṭha em em tih finfiah tawh a ni," a ti.

Project pathum an tlangzarh tâk chu farmer 700 huam tur a nih thu sawiin CM chuan, "A dawngtu tur thlan kawngah kan fimkhur tur a ni. Ruling party mi leh sa an nih avanga duhsak bik neihte rem kan ti lo. Tunhmain chutiang tih chu kan lo chîng tawh ṭhin a, hmalaknate'n a hlawhchham phah nasa ṭhin a ni," a ti a, sorkar tharah chuan a hlawhtling ngei turte chauh thlan tum tur a nih thu a sawi.

Lalduhoma chuan khaw 200 chuangah chhungkaw 4,000 aia tamte'n pangang an khawi mek tih sawiin, "An tharchhuah hralhna rate hi sorkar chuan tihsan a tum a ni," a ti.

Muga bik chu cocoon man a to fal hle tih sawiin Chief Minister chuan, "A pangang hi kan thing neihsa Nauthakte, Bul thingte hmanga chawm theih an ni. Mizoramah muga chi siam punna neih kan mamawh hmasa-a, chumi tur chuan Central Silk Board lamin Muga P3 unit min pe dawn a, kan rama pangang vulhtute tan hlawhtlin theihna a sang hle ang," a ti a, a enkawl dan thiam tawh chuan a hahdam tur thu a sawi.

Khualzahawm Serciulture minister Lalthansanga chuan maimaw pangang khawi chu thingtlang lama kut hnathawktute tan eizawnna remchang tak nia a hriat thu sawiin, "A hralhna lamah harsatna a awm si lo. Kan ram sik leh sate nen a inmil em em bawk si a, kan uar deuh deuh a ṭul. Project thar pathumte hian nasa takin Mizoram cocoon tharchhuah a tipung dawn," a ti.

Chief Minister-in project a tlangzarh takte chu cheng nuai 624.47 senna tur Eri Project - Lai Autonomous District Council chhunga chhungkaw 100 thlan chhuahte nena kalpui tur; cheng nuai 588.36 senna tur Mulberry Project- Chakma Autonomous District Council-a chhung­kaw 100 thlan chhuahte hmanga kalpui tur leh cheng nuai 1,339.61 senna tur Muga Project, Mizoram pum huapa chhungkaw 500 thlan chhuahte nena kalpui turte a ni.