Hmalaknate entawntlak leh chhuanawm tak a nih theih nan vil ṭhat a ṭul - PWD Minister

Public Works department (PWD) minister Vanlalhlana chuan nimin khan Zuangtuiah PWD hnuaia Quality Control, Research and Development Division a tlawh a, sorkar hnuaia hmalaknate chu entawntlak leh chhuanawm tak a nih theih nan enzui leh vil ṭhat a ṭul thu a sawi.

Vanlalhlana chuan PWD hnuaia hmalakna peng pawimawh tak Quality Control, Research & Development Division chu tun aia changtlung, pawimawh leh ṭha zawka kalpui a duh thu a sawi a, "Thawktu indaih lohna leh mamawh angte pawh a ṭul dan anga ngaihtuah zel a ni dawn," a ti.

Inkaihhruaina siamte ṭha taka zawm chunga sokar kaltlanga in sak, kawngpui siam leh hnathawh dangte puitlin a nih theih nan theihtawp chhuah a ṭul thu PWD Minister chuan a sawi.

Vanlalhlana chuan sorkar hnuaia hmalaknate chu entawntlak leh chhuanawm tak a nih theih nan enzui leh vil ṭhat a ṭul thu sawiin, insakna, kawng siamna leh hnathawhna dang reng reng atana hmanraw lakkhawmte chu a remchan dan ang zela uluk taka enfiah ṭhin turin PWD hotute a chah.

Quality Control, Research and Development Division Sr. EE Laltlanthangi Ralte chuan PWD Minister hnenah hian harsatna leh mamawh an neih bakah, an dinhmunte a thlen a ni.

Minister hian insakna, kawngpui siamna leh PWD kaltlanga hmalakna hrang hranga hmanraw hman ṭhin - cement, balu, lei, rod, bitumen, cement mix, building foundation zawh chin leh adangte endikna hmunpui Central Laboratory leh SA Training Centre, puakthei thil dahna leh bitumen chhekkhawlna hmunte a tlawh nghal bawk.