NEP hman hnua UG result hmasa berah zirlai exam zinga 53.14% an pass

Mizoram University (MZU) hnuaia Exami­na­tions department - Under graduate Section chuan nimin khan New Education Policy (NEP) 2020 kalpui a nih hnua under­graduate first semes­ter zirlai hmasa berte result a tichhuak a; zirlai exam 6,043 zinga 3,211 (53.14%) an pass.

NEP kalpui a nih hnua first semester (regular) exam hmasa berah hian Bachelor of Commerce (B.Com) zirlai 372 zinga 270 an pass-a, pass percentage hi 72.58% niin a sang ber. Bachelor of Home Science (BH) zirlai 20 zinga 7 (35%) pass-in an pass percentage a hniam ber thung.

2023 batch aṭang hian NEP 2020 hman ṭan a ni a, sorkar laipui Ministry of Education hnuaia University Grants Commission (UGC) in a beisei angin under graduate first semester zirlai zawng zawngte hi Academic Bank of Credit (ABC) ID nei vek tura tih an ni.

2023 batch result chhuah thlenga ABC ID nei lote chu an grade card hrèn sak niin, ABC ID an neih hma chu pek chhuah loh tura tih a ni a; ABC ID nei rih lote result erawh tih chhuahsak vek tho niin, ABC ID nei lo zirlai exam zinga 43.13% an pass a ni.

ABC ID nei lo zirlaite hian an neih hunah anmahni college ṭheuhah in-report anga, college principal-in MZU Examinations dept, UG Section-ah format hman lai angin a dilsak thei ang.

MZU thuchhuah tarlan danin, "ABC ID siam tur hian Aadhaar card neih a ngai a, sakhuana avanga Aadhaar card nei lote hi UGC chuan hriatthiamna/ngaihhnathiamna a pe lo a, zirna chhunzawm zel tur chuan Aadhaar card an nei ngei tur a ni tih hi UGC thuchhuak a ni a, ABC ID nei lo zirlaite hi zirna an chhunzawm zel remchang loah a ngai a ni," a ti.

ABC ID nei lote hi BA zirlai 2,245, B.Sc zirlai 218, B.Com zirlai 72, B.Sc (Home Sc) zirlai paruk leh BSW zirlai panga an awm mek a, an vaiin zirlai 2,546 an ni.