Leader of Opposition dinhmun sawifiah
Nimin khan leader of opposition Lalchhandama Ralte chuan Assembly Secretariat Annexe banquet hall-ah MJA member-te thingpui in puiin, leader of opposition dinhmun a sawifiah.
Lalchhandama Ralte chuan, Mizoramah leader of opposition kum 20 vel an awm tawh loh thu sawiin, "Leader of opposition awm tur chuan eptu party zingah MLA awm zat aṭanga hmun li a ṭhena hmun khat nei an awm a ngai. Chutiang an awm lo a nih chuan eptu party tina an leader-te chu opposition group leader an ni ṭhin," a ti.
Leader of opposition chu cabinet minister rank an nih thu sawiin Lalchhandama Ralte chuan, "Hlawh, motor, office, personal branch, house guard etc. pawh cabinet minister ang vek pek ka ni. Kan neih lohna a rei tawh avangin a dinhmun chiah hi kan hre tawh lo," a ti a, Assembly Secretariat lam pawhin an chian loh hman thu a sawi.
Leader of Opposition sawi danin, Mizoramah Leader of Opposition pathum chiah an la awm a, chu'ngte chu kum 1993-ah Zoramthanga, kum 1999-ah Lalhmingthanga leh kum 2003-ah Lal Thanhawlate an ni. Mah se, term laklawhah an party-in MLA 10 an neih tlin loh avangin a hnuah opposition group leader an ni leh.
Lalchhandama Ralte ṭawiawmtu MNF Legislature Party secretary R Rohmingliana chuan leader of opposition chu lirtheia an inzui chângin police lam pawhin an la hrethiam lo hlea a hriat thu a sawi.