KHAWTHLIR
JERC member
Govt. of India (Appointments Committee of the Cabinet) chuan Joint Electricity Regulatory Commission (JERC) for Manipur and Mizoram member atan Power & Electricity dept. SE Benjamin L Tlumtea a ruat. Benjamin-a hian Power Ministry, Delhi-a thutiam a lak hnuah JERC member a ni ṭan ang.
Heroin man
Excise & Narcotics dept. (END) chuan nimin khan hmun hnihah heroin an man. END hian zing dar 8:40 khan Durtlang Leitanah heroin gram 577 leh a neitua puh Vanneihmawii (30), Falam, Myanmar; Lalnunsiama (21) Kelkang, Champhai district leh Malsawmdawngliana (19), Edenthar, Aizawl tuna Dawrpui Vengthar-a khawsa mek nia inchhalte an man. Zing dar 8:50 ah Electric Veng, Aizawlah Laltlanmawia, Electric Veng, Aizawl nia inchhal hnen aṭangin heroin gram 40 an man leh bawk.
MLA-in tlawh
South Tuipui bialtu MLA Jeje Lalpekhlua chuan nimin khan a bial chhung Tarpho, Khawhri, South Chawngtui leh Cherhlunte tlawhin, bial mipuite'n amah an dawr theihna turin hun a buatsaih. Mipui, khawtlang hruaitu, NGO hruaitu leh party hruaitute'n mamawh an neihte a ngaihthlak bakah, sikul leh sorkar building chhia repair ngaite a hmunah a enfiah nghal.
Dy. CEM lalut
Nimin khan Mara Autonomous District Council (MADC) dy. CEM atan S Lalremthanga chu MADC Golden Hall-ah Siaha Fastrack Court judge Lalngaihmawia Zote-in rinawmna thu tiam tirin a lalut.
MLA chawimawi
Khawhai Village Council chuan nimin khan Khawhai Town Hall-ah an bialtu MLA W Chhuanawma, dy. chief whip chawimawina hun an buatsaih. W Chhuanawma chuan Pathian leh mipuite zara hnathawh kawr ha mai a nih thu sawiin, "ZPM sorkarah mipuite an thla a muang," a ti a, an bial mipuite chu a tana ṭawngṭai ṭhin turin a sawm.
Chapchar Kût
Chapchar Kût Organizing Committee chuan nimin khan an chairman C Lalsawivunga, Art & Culture minister ni bawk kaihhruaiin Chapchar Kût 2024 lawmna tura hmalakna hrang hrang an thlirho. Minister chuan mawhphurhna chelhtute chu phur taka thawk a, kût hlawhtling tak mipuiin an hman theih nan theihtawp chhuah turin a chah. Chapchar Kût lawmnaah hian food court, handloom & handicraft stall, painting & photo exhibition leh flower show, Chapchar Kût Run-te neih tura ruahman a ni.
Kuhva phurh khap
Aizawl district magistrate Nazuk Kumar chuan Aizawl district-ah dan phal loh kuhva phur lirthei an kal ṭhin tih hriat a nih thu a tarlang a, "Aizawl district chhung khawi hmunah pawh dan in a phal bâk chin kuhva leh bungrua reng reng lakluh leh phurh phal a ni lo," a ti. Thupek bawhchhia chu IPC Section 188 hmanga hrem theih an nih thu a tarlang bawk.
EVM Centre
Lok Sabha MP inthlanpui 2024 inbuatsaihna atan leh EVM hman dan hrechiang duh tan Aizawl DC pisa Election Branch leh Dar;lawn BDO pisaah Electronic Voting Machine Demonstration Centre dah a ni a; EVM hman dan inzirtirna leh inhrilhfiahna hmanrua atan he EVM Demonstration Centre hi siam a ni. A duh apiang tan Centre-ah hian office hun chhungin vote thlak chhin theih a ni a, EVM Demonstration Centre hi MP inthlan puan hma zawng chu kalpui tur a ni.
Kut hnathawktute zirtir
Khawzawla Krishi Vigyan Kendra (KVK) chuan nimin khan Khawhai Town Hall-ah kut hnathawktute pualin training an buatsaih a, bialtu MLA W Chhuanawma'n hmanpui. KVK mithiamte chuan kut hnathawktute chu sawhthing, hmarcha, hmunphiah leh aieng chungchanga hriattur pawimawh - chìn leh enkawl dan, natna chungchanga enkawl dan leh hlawk zawka thar theih dan tur an zirtir.