MZP-in Rangvamualah sikul an enfiah

MZP chuan nimin zing khan tunhnaia social media lama lang, Govt. Nepali Primary School, Rangvamuala zirlaite sikul kawta class an lak chungchang enfiahin a hmunah a tlawh a, an harsatna leh an dinhmunte an zirchiang nghal.

MZP tarlan danin Govt. Nepali PS, Rangvamualah hian zirlai nursery-ah 30, KG-ah 22, class I-ah 27, class II-ah 19, class III-ah 16, class IV-ah 13, an vaiin zirlai 127 an awm mek. Zirtirtu a nghet pahnih, MR zirtirtu pakhat leh SEDP zirtirtu pakhat an awm.

An school building a têt êm avangin, zirlai tam zawkin sikul chhung an chang loa, pawn ni sensa hnuaiah class an la ṭhin a ni. Zirtirtute pawh awmna tur an neih loh avangin chaw chhumna (kitchen)-ah an ṭhu.

MZP Branch, Rangvamual chuan tun hma aṭangin thuneitute hnenah sikul hi ngaihsak turin an lo ngen tawh ṭhin a ni.

AMC huam chhungah sorkar sikul dinhmun chhe lutuk leh ngaihthah a la awmfo chu mak an tih thu leh pawi an tih thu tarlangin MZP chuan, "World class education kan sawi tawh laia zirnain ngaihsak a hlawh tak tak lohzia tarlangtuah kan ngai," an ti.

MZP chuan nisa leh ruahsur hnuaia zirna kalpui hi engti kawng mahin an remti lo tih tarlangin, "February 10 ral hma ngeia sorkarin zirlaite harsatna sukiang tura immediate action a la lo a nih chuan, a ṭul angin hma kan la dawn," an ti a, zirlaiten nisa leh ruahsur hnuaia lehkha an zir avanga an hriselnain a tuar a nih chuan sorkarin mawh a phurh tur thu an tarlang.