Officer-a tlingthar rualbanlote chawimawina hlan

Commissioner for Persons with Disability (PwD) office chuan nimin khan Aizawl Press Club-ah Mizoram Combined Competitive Examination, 2023-a rualbanlo (PwD) quota-a tling mi pathumte chawimawina an buatsaih a; PwD Commissioner Vanlaldiki Sailo-in a hmanpui.

Mizoram Combined Competitive Examination 2023-a rualbanlo (PwD) quota-a tling Lalngaihawmi (MCS) hnenah MJA vice president Lalremsiama'n Commissioner for Persons with Disability office aiawhin lawmpuina thuziak a hlan a, Mizoram Blind Society adviser Lalbuatsaiha'n Lalremtluanga (MF&AS) hnenah Commissioner for Persons with Disability office aiawhin lawmpuina thuziak a hlan bawk. N Vahneichhi (MIS) erawh Siahaa a awm lai a nih avangin a tel ve lo thung.

Lalremtluanga s/o Zelṭhuama, Zemabawk North hi Persons with Benchmark Disabilities (PwBD) locomotor hnuaiah MF&AS-ah a inziak tling a; a naupan laiin a ke veilam motor-in a chil chhiatsak a ni.

Lalngaihawmi d/o Lalbiakdika, Mission Veng hi PwBD blindness & low vision hnuaiah MCS-ah a inziak tling a; a mit veilam chauhin khâp chanve vela hla bak a hmufiah thei lo a, a mit dinglamin thil a hmu thei lo bawk.

N Vahneichhi s/o N Pawkhai, Theiri pawh hi mitdel niin, PwD blindness & low vision hnuaiah MIS-ah a inziak tling a ni.

PwD Commissioner chuan, India ramah rualbanlote humhalhna dan ṭha tak 'The Rights of Persons with Disability' a awm thu a sawi a, "Hemi hmang hian sorkar hna hrang hrangah rualbanlote tan 4% aia tlem lo seat hauh a ni a; Mizoram sorkar pawhin rualbanlote seat hi ngaipawimawhin, rualbanlo mi 90 velin Mizoram sorkar hnuaiah hna an hmu ve tawh a ni," a ti.

Mizoram sorkar hnaa grade sangah PwD quota-a mi pathum an inziak tling chu lawmawm a tih thu sawiin Vanlaldiki chuan, "Tuna officer tlingtharte hian ṭha takin hna thawk ula, in naute nakina lo la awm zel turte tan kawng sialtu in ni. Nangni'n ṭha taka in thawha, theihtawpa in beih chuan in hnunga lo awm lehzel turte pawh sorkar hotute'n an lo chhawr châk dawn a, in pawimawh takzet a ni," a ti a, rualbanlote tan entawn tlak ni chhunzawm zel turin a chah.

Vanlaldiki chuan rualbanlo hmun hrang hranga awmte chu sorkarin an tana hna a hauh sak, 4% aia tlem lo chu hman ṭangkai tuma bei tur leh theihtawp chhuah turin a ngen a; sorkarin rualbanlote hamṭhatna turin nasa takin hma a lak mek thu a sawi bawk.