Lirtheiah emergency-a biakpawh theihna tur phone number dah ṭheuh turin Traffic SP-in lirthei neitute a ngen

Aizawl Traffic SP Stephen Lalrinawma chuan thuchhuah siamin, lirthei khalhtute fimkhur lehzual turin chah a; lirthei neitute chu an lirthei an kalsan dawnin an lirtheiah emergency-a biakpawh theihna tur phone number dah ṭheuh turin a ngen.

Traffic SP chuan, Traffic Police-te'n an duty hmun aṭanga ni tina an thil tawn leh hmuh ṭhinah lirthei khalhtute an fimkhur a ngai hle tih a lan thu a tarlang a, "Lirthei khalh, a hman dan leh enkawlna kawngah lirthei neitute'n hma kan sawn zel a. Amaherawhchu, traffic dan leh hrai hriat loh vangte, ngaihthah hrim hrim leh fimkhur tâwk loh vanga chesual leh man ngai kan awm fo ṭhin. Hemi kawngah hian ṭan la thar zel turin lirthei neitute kan infuihthar a ni," a ti.

Mizoramah two wheeler, a bikin scooty hman theiha a awm hnuah lirthei khalhtu zingah hmeichhia an pung nasa hle tih sawiin Traffic SP chuan, "Nu-in an fate paw chung leh two wheeler (private & commercial)-ah bawr tak taka sikul naupang phur hmuh tur kan awm ta fo mai a, kan naupang phurh lai lo muthlute pawh hmuh tur an awm fo ṭhin," a ti a, two wheeler khalhtute chu anmahni leh an mi phurhte himna ngaihtuah reng ṭhin turin a ngen.

Stephen Lalrinawma chuan tunlai car chhuak thar ṭhenkhatah a chung khuhna (sun roof) hawnga lirthei tlan laia naupang dak chhuak leh ṭhu chhuak hmuh tur an awm fo tih a tarlang a, "Tlangram kawng zîm/tê leh kawi tak taka lirthei khalh kan nih avangin hetianga naupang an ṭhu chhuak leh ding lawr mai ṭhin hi a him lo hle a, nu leh pate'n kan tu leh fate himna ngaihtuaha hetianga chuantir lo turin kan inngen bawk a ni," a ti.

Lirthei neitute chu lirthei an kalsan dawnin emergency-a biakpawh theihna tur phone number an lirtheiah dah ṭheuh turin a ngen a; naupang himna ngaihthah taka lirthei khalh hi The Motor Vehicles (Driving) Regulations, 2017 Regulation 5 (8)-in lirthei khalhtute mawhphurhna a duan bawhchhiatna a nih thu leh MV (Amendment) Act, 2019 Section 177 hmanga hrem theih an nih thu a tarlang bawk.