Doctor leh police-te lakah thuneihna nasa taka hmansual a ni - MNF Ṭhalai

MNF Ṭhalai chuan thuchhuah siamin, MNF joint secretary J Rosangpuia (Spa Jongte) man a nih chungchangah doctor leh police-te lakah thuneihna hmansualna nasa tak a thleng niin an tarlang.

MNF Ṭhalai chuan May 10, 2023 a tuna chief minister Lalduhoma'n court-a criminal complaint a thehluh bawhzuiin Cyber Crime Police Station-in J Rosangpuia hi an man thu tarlangin, "J Rosangpuia hi February 5, 2024 zanah man a ni a, Aizawl PS lock up-ah zan khat a riah hnuah a tukah court-ah hruai niin, police-in darkar 72 kawl an dilna chu phalsak an ni," an ti.

Dan pangngai angin police-te hian February 6 thim hlimah J Rosangpuia hi lock up-a dah turin a hriselna a ṭha tâwk em tih Civil Hospital, Aizawlah enfiahtir a nih thu sawiin MNF Ṭhalai chuan, "Thla hnih kalta-a accident avanga nikhaw hre loa lo awm tawh, nghawng ruh fel lo nei, inenkawl lai leh BP sang nei a ni," an ti a, doctor-in lock up-a khung turin a hriselna dinhmunin a tlin rih lo tih report a ziah thu an tarlang.

MNF Ṭhalai tarlan danin, police-ten chhuah lailawk tir rih mai an tum laiin, Chief Minister Office aṭanga chhuak ni ngeia ngaih thupek khauh tak police-te leh doctor-te hian an dawng. Police-te hian J Rosangpuia hi Civil Hospital, Aizawlah hruai nawn lehin, doctor duty chu medical exam tih nawn luihtir a nih hnuah police station-ah hruai leh a ni.

Police-te leh doctor-te'n thuneitu sang ber aṭanga na taka nawr luih an tâwk tih an hriatin J Rosangpuia chhungte leh a ṭhian ṭha, chanchin ngaihvena police station-a kalte'n J Rosangpuia hriselna dinhmun hi enfiah nawn leh an ngen a, zan dar 10 hnu lamah Civil Hospital-ah hruai nawn leh niin, senior doctor-in damdawi-inah a lo admit.

MNF Ṭhalai chuan CM pawisawitua puh a nih avangin J Rosangpuia chungah cout-in a finfiah hma hauhin mihring dikna chanvo bawhchhiatna nasa tak a thleng nia tarlangin, "Police-te kutkea hmang luia sorkar thuneihna hmansualna nasa tak a thleng leh doctor-te thiamna leh hriatna rinhlelhsak hi hmun dangah a thleng ngai lo," an ti.

Lalduhoma sorkar hnuaiah doctor-te meuhin hmuhsit leh rahbeh an tâwk nia tarlangin MNF Ṭhalai chuan, "Hetianga mi chak lo zawk leh thil ti thei lo zawkte chunga dan piah lama thuneihna hmansualna leh hleilenna hi tu chungah mah thleng tawh lo se kan duh tak zet a ni," an ti a, sorkar hnathawkte thlavang hauha, an dikna humhim tura an inhuam reng thu an tarlang.