FIG hnuaia kuthnathawktute'n nikumah cheng vbc. 14.68 man thlai an thar

FOCUS-DMU Khawzawl District Level Coordination Committee chu nimin khan additional DC Lalfakzuala kaihhruaiin an ṭhukhawm a; Khawzawl district FIG hnuaia kut hnathawktute'n kum 2023 chhungin cheng vbc. 14.68 man thlai hrang hrang an hralh tih tarlan a ni.

Lalfakzuala chuan, FOCUS hmalakna avangin Khawzawl district-in thlai chìn leh ran vulh kawngah hma a sawn nasa hle tih a sawi a, "Kut hnathawktute thâ tih chak nan Primary Agriculture Credit Society (PACS), Common Service Point, Crop Insurance kawnga hmasawn te leh Drone Technology hmanga insecticides kahna ngaihtuah chu thil ṭul tak a ni," a ti.

Ṭhutkhawmah hian kum 2023-2024 3rd Quarter chhunga FOCUS hmalakna leh hmachhawpnate thlirho a nih bakah, FOCUS hnuaia line department-te leh Farmer Interest Group (FIG)-te nen harsatna leh hmalak zel dan tur an sawiho nghal a ni.

Kum 2023-24 Quarter thumna (October-December) chhungin Khawzawl disrtict-ah FOCUS kaltlangin chhungkaw 300 hnenah vawk note sem a nih thu te, vawk vulhtu chhungkua 11-te tan vawk inthlahpun theihna tur vawk in changtlung tak Rs 2,30,250 ṭheuh senga sak a nih thu te, ṭhalaite tan skill development training buatsaih a nih thu leh thiam thil hrang hrang - communication skills, pickle siam, theitui siam, chhang ur (baking) leh aieng dip siam dante zirtir an nih thu te, FOCUS hmalaknate chu documentation buatsaih a nih thu leh kut hnathawktute tan training buatsaih a nih thute tarlan a ni.

Khawzawl district-a FIG hnuaia kut hnathawktute'n kum 2023 chhung khan tomato quintal 3,000, zikhlum quintal 332, dragon fruit quintal 10.5, Mizo hmarcha quintal 28.85 an tharchhuak a; heng thlai an thar chhuah aṭang hian Rs 1,46,80,600 an lei chhuak a ni.