Ramri hung a nih loh nan NGO-te'n hma an la dawn

NGO Coordination Committee (NGOCC) hruaitute January 6, Thawhlehni khan MZP pisa-ah an ṭhukhawm a, India leh Myanmar ramri hung a nih lohna atan leh ram pahniha ramri hnaiha chengte inkalpawh theihna free movement regime (FMR) tihtawp a nih lohna atan hmalak an rel.

NGOCC meeting hi an chairman Lalhma­chhuana, CYMA president-in a kaihruai a, India sorkarin India leh Myanmar inrina hung (border fencing) a tum chungchang leh FMR ṭhiah a tum chungchang an ngaihtuah.

Myanmar ramah Zo hnahthlak ṭha­hnem tak an chen avangin border fencing leh FMR ṭhiah tum chu inauna leh inpumkhatna ti chhe thei a nih thu tarlangin NGOCC chuan, "India sorkar hmalak tum dan hi ṭha kan ti lo. Mizo hnam ṭhendarh tumnaah kan ngai," a ti.

NGOCC chuan FMR chu dan hnuaia siam a nih thu tarlangin, "Tuna mi ang hian kalpui zel ni se. Border fencing-in ramria chengte tan nasa taka harsatna a siam dawn avang leh Mizo hnam inpumkhatna khawih chhe thei a ni," a ti a, border fencing leh FMR-a hmalakna hi tihtawp a nih theih nan hma lak nise an ti.

Meeting-a an rel dan chuan, NGOCC hmingin Union Home Ministry-ah memorandum an thehluh dawn a, Mizoram sorkarah pawh hemi kaihhnawihah hian lehkha an thehlut ang. Border fencing-in a nghawng tur state dangte pawh a ṭul angin an thawhpui dawn.

NGOCC chuan ramri hung a nih lohna atan leh FMR tihtawp a nih lohna atana ke an penna turah hian a ṭul anga hmalakna turte pawh an ruahman a nghal.