Damlote tan in ka luah dawn - MLA Jeje Lalpekhlua

South Tuipui bialtu MLA Jeje Lalpekhlua chuan nimin khan a bial chhung khaw hrang hrang tlawhin, damlohna avanga Zoram Medical College (ZMC) pantute tan Falkawnah in a luah dawn thu a sawi.

Jeje Lalpekhlua chuan a in luah tur hi an tihfel thawkhat tawh thu sawiin, "Chei a la ngaih avangin an chei mek a, thla tharah chuan hawn theih a nih ka beisei. Hei hi damlote leh anmahni awmpuitute thlamuang taka an chênna in anga an chên theihna tur atana ruahman a ni," a ti.

Hna chi hrang hrang a chhuah hunah an party mi leh sa bakah mi dangin an thawk dawn tih sawiin South Tuipui Bialtu MLA chuan, "Ṭha taka hna thawk turin ka chah nghal che u. Hna zawng zawng hi kan enpui vek dawn a, a ṭha tur a ni ringawt," a ti a, hna a ṭhat loh chuan an indim loh tur thu a sawi.