Ram hruaitute'n MJA khawmpui hmanpui

Lawngtlai District MJA chuan February 6, Thawhlehni khan an press club-ah annual conference an hmang a, IPR minister Dr Vanlalthlana, adviser to CM Dr Lorrain Lalpekliana Chinzah, Lawngtlai East bialtu MLA leh Lunglei West bialtu MLA T Lalhlimpuiaten an hmanpui.

IPR Minister chuan media ṭhangzelah journalist-ten nasa zawka an beih a ngaih thu sawiin, "Ṭhuthmun atanga news zawng khawm loa, khawtlang leh ram siamṭhat nan chhungril zawk luhchilh a, chanchinthar ṭangkai haichhuah kawngah ṭan lak a ṭul," a ti a, MJA member-te chu a ṭul apiangah sorkar hmalaknate chu umzui a, chhui a, kal sualna lak a venpuitu ni turin a sawm.

Sorkar hmasain journalist pension a lo ruahman chu chak tak a bawhzui a nih thu sawiin IPR Minister chuan, "Sorkar hmasain thil ṭha chhunzawm tlak a hnutchhiahte chu theihtawp chhuah a bawhzui zel kan tum," a ti.

Dr Vanlalthlana chuan sorkar hnuaia hamṭhatna hrang hrang awmte chu mipuite hnen a hrilhhriat a pawimawh thu sawiin, hemi kawngah hian Lawngtlai MJA-te chu ṭan la turin a fuih a, chanchinbu leh media platform hrang hrangte kaltlang a mipuite hnena thu dik chauh kan thlen chuan mipui tan thuthlukna dik siam a awl tur thu a sawi bawk.

Dr Lorrain Lalpekliana Chinzah chuan chanchinbumite chu sorkar leh mipui thlunzawmtu pawimawh tak an nih angin thlei bik nei loa, huaisen tak a thu dik puan chhuah hna kalpui chhunzawm zel turin a chah.

T Lalhlimpuia pawhin MJA member-te chu sorkar langtlang siamna kawngah leh a ṭul hun a siamṭhatna kawngah thurawn petu leh khalh ngiltu ni zel turin a chah.

Lawngtlai District MJA president Lalngheta Ralte pawhin thu sawiin, "MJA member-te'n kawng hrang hrangin dawmkan an mamawh. Sorkarin hand holding policy a kalpui turah pawh journalist-te min huam tel ngei kan beise," a ti a, awmze nei zawka journalist-te hmakhua ngaia sorkarin ruahmanna a siam a ṭul thu a sawi.