ZMC atan special grant hmuh a ni dawn: Cashless-in health care kalpui kan tum - Health Minister

Health minister Lalrinpuii chuan nimin khan a pisa-ah thuthar thehdarhtute a kawm a, cashless-in health care kalpui an tum thu leh Zoram Medical College (ZMC) atan a bik taka ṭanpuina (special grant) hmuh a nih dawn thu a sawi.

Lalrinpuii chuan AB-PMJAY hnuaiah health insurance (golden card) mi 5,19,150 in an neih mek thu sawiin, "Hei hian mipui a huam kim loh avangin Mizoram Universal Health Coverage Scheme sorkarin a duang mek. Official level meeting vawi 1 leh inter ministerial level meeting vawi 1 neih a nih tawh bakah, Chief Minister kaihhruaina hnuaiah meeting vawi 1 neih leh tum a ni," a ti.

Mizoram Universal Health Coverage Scheme chu damloten anmahni pawisa seng loa damdawi-ina an inenkawl theihna tur (cashless system) a kalpui tum a nih thu sawiin Minister chuan, "Hemi atan hian uluk takin sum hmuhna tur te, sum hman dan tur te, bill theih chin leh rate hrang bithliah tur chin zirchian mek a ni," a ti a, cheng nuai 5 thleng bill theih a nih tur thu a sawi.

Health Minister chuan central sorkar kuta ZMC hlan mai a ṭhat thu sawiin, "Hemi chungchang hi January 17, 2023 khan Union Health Minister ka sawipui a, ani chuan theihtawpa min ṭanpui lo inhuamin, state sorkarin ṭha zawka a kalpui theihna atan special grant pek min tum thu min lo hrilh. Hemi atan hian project proposal siamfel a nih veleh Union Health Minister ka hmu leh a, proposal hi ka thehlut," a ti.

Lalrinpuii sawi danin, Union Health Minister hian Lok Sabha MP inthlan hma ngeia special grant 1st instalment pek chhuah hman a tum. Tunhnaiah Chief Minister Delhi-ah a kal dawn a, chumi hunah chuan 1st instalment hi tihfel theih beisei a ni.

ZMC hi endik leh mai tur a ni a, sum dinhmunin a zir loh avangin a nih tur ang a la nih loh nasat bakah, thawktu lak kawngah pawh state dangin an ngam huai zawk zel avangin thawktu lak turte chân phah ṭhin a ni. Central sorkar aṭanga special grant hmuh a nih hunah chuan heng harsatnate hi chinfel theih a nih beisei a ni.

Health Minister chuan Civil Hospital, Aizawl lun lutuk leh a hmunhma chep lutuk chhawk zangkhaina turin Kulikawn Hospital complex-ah khum 100 awm theihna damdawi-in, Civil Hospital, Aizawl annexe siam tum a nih thu sawiin, "State Level Executive Committee-in cheng vbc. 89.68 min pawmpui tawh," a ti a, Chief Minister hoin a hmunah hmalak dan tur an enfiah tawh thu a sawi.