Mizoramah vote nei mi 8,56,297 an awm; Mipa aiin hmeichhe vote nei 26,743-in an tam

District hrang hranga district election officer (DEO)-te chuan nimin khan an district ṭheuha final electoral roll an tlangzarh a; Mizoramah vote nei mi 8,56,297 an awm a, mipa vote nei aiin hmeichhe vote nei 26,743-in an tam zawk.

Final electoral roll tlang­zarhnaah hian Election kaihhnawih sorkar official-te, political party leh tlawmngaipawl aiawhte an tel a, DEO-te chuan political party hrang hrang hnenah electoral roll hard copy leh soft copy an hlan a ni.

Electoral roll thar bera a lan danin, Mizorama voter 8,56,297 zinga 4,14,777 chu mipa an ni a, mi 4,41,520 chu hmei­chhia an ni; mipa aiin hmeichhia 26,743-in an tam.

Roll ennawnna tura draft roll tihchhuahah khan Mizoram pumah voter 8,52,500 an awm a, final electoral roll-ah hian voter 8,56,297 awmin, a punna chu 3,797 a ni.

Mizoram electoral roll tharah hian service voter 4,980 an awm a, mipa 4,890 leh hmeichhia 90 an ni. Mizoram pumah polling station 1,276 a awm.

Chief Electoral Officer (CEO) office chuan thuchhuah siamin, India khua leh tui dik tak, Special Summary Revision 2024-a kum 18 tling tawh, rokhawlhna vanga electoral roll-a inziaklut ve hman lote leh April 1, 2024-a kum 18 tling hman turte tan continuous revision kalpui chhunzawm tur a nih thu a tarlang.

CEO office tarlan danin, e-roll a inziahluh dilna form-6 hmangin mahni bialtu ERO/AERO/BLO hnenah theihluh theih a ni a, e-roll a chuangsate tan pawh mahni awmna bial sawn leh e-roll a tihdanglam ngai a awm chuan dilna form-8 hmangin a thehluh theih. Dilnate hi https://voters.eci.gov.in leh Voter Helpline App aṭangin thehluh theih a ni.