Saza tihlumtute kum 3-7 jail tan theih : Durtlang khama saza tihhlum tum an awm

Aizawl Wildlife Division deputy conservator of forest PC Lalṭanpuia chuan Durtlang chuàn hnuailama saza (Mizoram state animal) chu humhalh lai leh tihnat phal loh a nih thu a tarlang a; dan bawhchhiate chu kum 3-7 thleng jail tan leh Rs 25,000 aia tlem lo pawisa chawitira hrem theih an nih thu a tarlang.

PC Lalṭanpuia chuan tun­lai hian Durtlang khama saza awmte kah tuma veh ṭhin an awm thu a tarlang a, "He'ng sazate hi tina lo tur leh dan bawhchhe lo turin En­vi­­ronment Forest & Climete Change department chuan mitinte a ngen a ni. Saza hi kan state animal a nih mai bakah, Wildlife Protection Act, 1972 chuan venhimna sang ber (Scheduled-I) hnuai­ah a dah a, tihnat, tih­hlum leh an sa eite khap tlat a ni," a ti.

Dan bawhchhiate chu kum 3-7 thleng jail tan leh Rs 25,000 aia tlem lo pawisa chawitira hrem theih an nih thu a sawi a; ramngaw leh nungcha humhalh kawngah NGO leh mitinte thawhpuiah a sawm.