Minister-in sorkar laipui hotute a dawr

Minister of state Lalnghinglova Hmar chuan February 7, Nilaini leh nimin khan Delhi-ah a department enkawl - Sports and Youth Services, Excise & Narcotics leh Labour, Employment, Skill Development & Entrepreneurship department kaihhnawih sorkar laipui hotute a kawm.

Nimina Ministry of Youth Affairs and Sports hnuaia Youth department secretary Meeta Rajivlochan a kawmnaah Lalnghinglova Hmar chuan, Mizoramin sports lam a hmelhriat ṭhat viau rualin Youth Affairs lamah ṭan lakna tur a la ngah thu a sawi a, hemi kawnga ṭanlakpui tur leh Mizoramah lo zina Mizoram dinhmunte a taka hmuhpui turin a sawm.

Lalnghinglova Hmar chuan Youth dept. Secretary hnenah hian Youth Affairs hnuaia Mizorama Youth Hostel-te chu a building a hlui tawh thu leh sakṭhat a hun tawh thu a hrilh.

Meeta Rajivlochan chuan hma a lakpui tur thu lo hrilhin, ṭhalaite tana Ministry of Youth Affairs and Sports-in programme hrang hrang a siamte hmang ṭangkai turin Mizo thalaite a sawm a, inziahluhna tura siam mitin ban phak mybharat.gov.in chu hmang ṭangkaia inziaklut ṭheuh turin a sawm bawk.

February 7, Nilaini khan Tetea Hmar hian Minister of State for Minority Affairs John Barla chu a chenna-inah a kawm a; Mizoram chu minority awmna a nih avangin ngaihsak a ṭul bik dan leh ministry hnuaia hamṭhatna awm thei ang angah Mizoram hmaih lo turin a ngen.

Minority Affairs Minister chuan Mizoram chu an ngaihsak thu leh an ngaihsak zawm zel tur thu a sawi a, a ministry hnuaia scheme awm aṭanga duhsakna an pek ṭhin thu leh project a tam thei ang thawn zel tura a duh thute a lo hrilh a ni.

Excise & Narcotics minister Lalnghinglova Hmar hi Nilaini vêk khan minister of state for DoNER BL Verma nen an inkawm. Lalnghinglova Hmar chuan, "Mizoram chu ramri hrula awm a nih vangin ram pawn aṭangin ruihhlo leh phal loh thil dang a lo lut nasa a, hemi dona kawngah hian Excise and Narcotics department chu thuam chak a ṭul," a ti a; state budget pawn lama puihna awm theite dappui turin DoNER Minister chu a ngen.

BL Verma chuan Mizoram sorkar thar chibai bûkna thu a sawi bakah, state mamawhte ziaka thlen turin a chah a, a office aṭanga tih theih awmah tlanchhiat a tum loh thu a leh DoNER ministry chu hmarchhak tana ding a nih angin hmarchhak mipuite tan a nih thu te, chumi kawngah chuan a ṭul ang anga tlan kual tura a inpeih thute a sawi.

LESDE minister Lalnghinglova Hmar hian sorkar laipuia Ministry of Skill Development and Entrepreneurship (MSDE) secretary Atul Kumar Tiwari leh a thawhpuite chu skill development lama Mizoram hmasawnna tur a sawipui a; kum kaltaa harsatna awmte chinfel dan tur an sawiho nghal.

Tetea Hmar chuan Mizorama sorkar thar piang chuan 'hand holding policy' kalpui a tumna kawngah MSDE ministry chu an innghahna tur a nih thu a sawi a; Chief Minister pawhin a ngaih pawimawh thu leh MSDE Secretary nen an inkawm tawhna bawhzuia kal a nih thu a sawi.

Atul Kumar Tiwari chuan Mizoramin hmasawn a tum tih a taka a lan thu sawiin, hun inhnaih taka Minister-in ṭum hnih lai a office a tlawh chuan an ti tak tak tih a lantir thu a sawi a, an theihna zawnah chuan Mizoram pui turin an tlanchhiat loh tur thu a hrilh.

Inkawmnaah hian MSDE hnuaia sum tâng awm ang ang pek chhuah vek an tum thu MSDE hotute chuan an sawi a, sorkar kum 2023-2024 tawp hmaa tih tur hmanhmawhte an sawi bakah, Mizoram sorkara LESDE department lamin hmachhawp an neih an thehluhte an enfel nghal a; Mizoram sorkara LESDE hmachhawpte chu tihhlawhtlin an intiam rualin, thil ṭhenkhat erawh chu sorkar laipui kalphung nena her rem a ṭul thu an sawi.

LESDE Minister hian nimin vek khan Minister of State for Skill Development and Entrepreneurship (MSDE) Rajeev Chandrasekhar a kawm.

Rajeev Chandrasekhar chuan Mizoram sorkar that in skill development lama hmalak a tum tak tak chu lawmawm a tih thu a sawi a, "Thil kalphung pangngai pet pet ni lo, Mizoram mil project siam ula, chu chu a hlawhtlin theihna turin ka lo pui ang che u," a ti.

Sorkar laipuiin skill development leh entrepreneurship lama hma a lâk nasat thu sawiin, "Hei hi India ram puma kalpui tur a ni," a ti a, mahni ram awm dan leh kan thiamna azirin kan siam rem thiam tur a nih thu a sawi.

Lalnghinglova Hmar chuan chief minister Lalduhoma hoa 'hand holding policy' kalpui tura committee hranpa a din thu leh chumi kawng chuan MSDE chu nasa taka an behchhan tur thu a sawi. Rajeev Chandrasekhar chuan Mizoram hmachhawpte chu a ministry kal dan nen thil inmil a nih thu a hrilh.

Minister Lalnghinglova Hmar hi LESDE secretary Lalramsanga Sailo leh director Angela Zothanpuii-te'n an ṭawiawm a ni.