Kalphung thar a taka kalpui a ni - Assembly Speaker

Assembly speaker Lalbiakzama, Chalfilh bialtu MLA chuan tunlai hian a bial chhung khaw hrang hrangte fang mekin, kalphung thar a taka kalpui mek a nih thu a sawi.

Chalfilh Bialtu MLA chuan amah lo dawngsawngtu a bial mipuite hmaah, MLA inthlan neih zawh takah thlan tlin an nih theihna tur atan chauh kalphung thar, mipui sorkar an aupui loh thu sawiin, "A takin kan kalpui mek tawh a ni," a ti.

Lalbiakzama chuan sorkar aṭangin a thlawna dawn tum ringawt tur a nih loh thu sawiin, "He ram leh sorkar tan engnge ka tih ve theih tih hi kan zirchhuah a, a tak taka kan kalpui a ngai," a ti a, sorkar beh chhan ringawta in lak len tum loa, mahni theihna zawnah zel intodelh leh hmasawn tum tur a nih thu a sawi.

Inthlan hmaa a lo tiam tawh a bial chhunga MLA office hawn leh MUP In khaw tina din chu hmalak mek a nih thu sawiin Lalbiakzama chuan, "Phullen khuaah office hawn ka inpeih tawh. Khawdangah pawh hawn belh a ni dawn," a ti.

Lalbiakzama hian central scheme hnuaia hna hrang hrangte, in kalpawhna leh zirna leh hriselna lama bial chhung harsatnate chak zawka hmalak a nih theih nan bial mipuite hmalak dan tur a sawipui nghal.