PUC-ah international seminar buatsaih: Social media-ah a ṭha zawnga Mizo hnam nun chàwikàn zel a ṭul - Art & Culture Minister

Pachhunga University College (PUC) hnuaia English, Mizo, Philosophy leh Education department ṭangkawp chuan nimin khan PUC Seminar Hall-ah social media-in hnam nunphung a nghawng dan zirchianna, 'International Seminar on Social Media and Tribal Culture : Impact and Intersections' an buatsaih a, Art & Culture minister C Lalsawivunga'n a hmanpui.

C Lalsawivunga chuan, ni tin nunphungah social media platform hrang hrangte'n bu a khuar thûk thu leh ṭangkai taka hman a nih theih thu a sawi a, "University leh college pawhin zirna ṭha zawk kalpuina atan an hmang ṭangkai hle a, khawvel changkang zelah social media chu tribal culture vawnhim kawnga ṭangkai taka hman thiam a ṭul. Nghawng ṭha lo a neih loh nan theihtawp chhuah a ngai a ni," a ti.

Social media chakna hmanga khawvel hriata Mizo hnam nihna hrang hrang phochhuak a, a ṭha zawnga Mizo hnam nun chawikan zel a ṭul thu sawiin Art & Culture Minister chuan, "Ṭhangtharte vanneihna chu zirtirna pangngai mai bakah, tunlai thiamna hmangin khawvel hmun dang dang aṭanga mithiamte zirtirna an ngaithla thei hi a ni," a ti a; social media-in tribal culture leh khawtlang nunphunga nghawng a neih dante zirchianna PUC-in an buatsaih chu lawmawm a tih thu a sawi.

International seminar-ah hian Oxford University, UK, Mauritius, Mumbai leh India ram hmun hrang hrang leh, Mizorama mithiam 36-te paper buatsaih zirho a ni a, vawiinah chhunzawma zawh a ni ang.