Mizoram sorkarin a tih tur a la tih loh vangin Mizoram Engineering College-ah zirna la ṭan lo

Higher & Technical Education (HTE) minister Dr Vanlalthlana chuan nimin zingah khan Lungleiah Mizoram Engineering College, Mizoram Polytechnic, Hatim, Lunglei Gov’t College, Leitlangpui HSS, DEO pisa leh MBSE pisate a tlawh. Mizoram Engineering College-ah hian Mizoram sorkarin a tih tur a la tih loh vangin zirna ṭan theih ala nih loh thu tarlan a ni.

Mizoram Polytechnic, Lunglei Students’ Association leh faculty member-te'n an harsatna leh thawktu indaih lohnate an lo thlen chungchangah HTE Minister chuan, "Thil ka ti ang ti a, ti leh si lo hi ṭha ka ti loh avangin engmah ka tiam ngai lo a, tiam pawh ka duh lo," a ti a, a theihna zawn leh phâk tâwkah harsatnate sukiang tur erawh chuan theihtawp a chhuah tur thu a sawi.

Dr Vanlalthlana chuan zirlaite chu danglam a ngaih huna danglam ngam tura huaisenna nei turin a chah a, "In thil tuipui zâwng chu eizawnna atana hmang thei tur khawpin tuipui ula, calculated risk la ngam tur khawpin huaisen ang che u," a ti.

HTE Minister hi Lunglei district-a MLA pathum - V Mal-sawmtluanga, Lalramliana (Papuia) leh T Lalhlimpuia bakah, LMC chairman Lalzuithanga leh sorkar hotu dangte'n an ṭawiawm a ni.

Sorkar thuchhuah tarlan danin, Lunglei Pukpuia Mizoram Engineering College hi April 22, 2016 aṭang khan Ministry of Human Resource and Development (MHRD) hnuaia RUSA fund cheng vbc 26 hmanga sak a ni a; Central share vbc 23.40 leh state share vbc 2.60 a ni.

Mizoram Engineering College-ah hian mipa leh hmeichhe hostel, library, workshop & laboratory room, common room, cafeteria leh administrative block-te November 16, 2018 khan sak zawh tawh a ni.

Mizoram sorkarin a siam ve tur - a panna kawng (km 3) tihzauh, laihzawl ṭhat leh blacktop hna te, tui pekna leh dahkhawlna (water connection & storage) leh kawlphetha pekna (power supply)-te hi engmah thawh a la nih loh avangin zirna ṭan theih a la ni lo. Heng atan hian central-a ministry hrang hrangah fund dilna thehluh ṭhin niin, tun thlengin a la hlawhtling rih lo.

January 23, 2024 khan Rs 14,83,02,000 senna tur 'Critical Infras-tructure Requirement for functioning of Mizoram Engi-neering College, Pukpui, Lunglei' chu PMJVK hnuai aṭanga funding turin proposal thehluh leh a ni.

HTE dept. chuan Mizoram University (Southern Campus)-a hman lailawk (temporary) turin Mizoram Engineering College hmun hi a lo remti tawh a, MZU (Southern Campus)-ah hian engineering zirna course erawh an tel ve a ngai thung ang.