State Day-ah ṭawngṭai rual tur

State Day Celebration Committee (SDCC) chuan nimin khan Aizawl Press Club-ah thuthar thehdarhtute kawmin, Mizoram State Day (February 20) hian Lammualah zaihona leh ṭawngṭaihona neih tur a nih thu an sawi.

SDCC hruaitute chuan man missionary-te zara Kristian ram tiin kan inchhal tih sawiin, "Mizote hian February 20, 1987 aṭang khan state puitlinga hlan kai kan nih hriatreng nan kum tin State Day kan hmang ṭhin a, official function bak engah mah Kristian kan nihna lantir zawnga tih a la awm ngai lo," an ti.

State kan nih hnua Mizoram awm dan hi ringtute leh ṭawngṭai mite tan a khawp kham ta lo nia hriat a nih thu sawiin SDCC chuan, "Chuvangin tuna kan sorkar lo din phat aṭang khan a ram pum huapa Pathian hnena ṭawngṭai ni hmang ve tawh turin Pathian mi ṭhenkhatte leh kan Chief Minister ngei pawhin a lo sawi tawh," an ti a, CM nen an sawiho hnuah State Day of Prayer Committee din nih thu an sawi.

SDCC hruaitute sawi danin, Chief Minister duhsakna hnuaiah State Day hi ram pum huapa sual ngaihdam dila chawnghei ṭawngṭai beihpui ‘Ninevi Challenge’ atan hman a ni dawn. Chhun dar 12:55 thleng zaiho tur niin, dar 1 ah chief minister Lalduhoma'n a hawnna hun hmangin, ṭawngṭairualna hun atan hman zui a ni ang.