Leithum khuaah ASF hri a leng

Champhai district additional magistrate M Misael chuan Champhai district-a Leithum khuaah vawk pùl hri, African Swine Fever (ASF) a leng tih finfiah a nih thu a tarlang a; vawk thi leh damlo an awm chuan AH & Vety department hotute hnenah hriattir turin mi tin a ngen.

M Misael chuan, tunhnaia Leithum khuaa vawk thi chu ASF vanga thi a ni rih finfiah a nih thu a tarlang a, "He ran natna hi a darh zel lohna tur leh kan district kan him theihna tura hmalak a ṭul a, Leithum khua aṭangin vawk/vawk sa leh vawksa aṭanga siam reng reng hralh chhuah/thawn chhuah/lakluh khap tlat a ni," a ti.

Champhai district-ah ram dang leh state dang aṭanga vawk, vawksa leh vawksa aṭanga siam reng reng lakluh khap a nih thu te, vawk damlo talh khap a nih thu te, vawk damlo a awm chuan dah hran vat tur a nih thu leh vawk thi reng reng thûk taka phum tur a nih thu a tarlang a; thupek zawm lote chu IPC Sec. 188 hmanga hrem an ni ang.