KHAWTHLIR

Kuhva rah man

Champhai Police, Chalbawiha Junction, Khankawn Police check gate-a duty leh Champhai PS OC kaihhruai patrolling party-te chuan truck pahnih aṭangin kuhva rah an man. Kuhva rah hi Malsawmkima, Melbuk khalh truck MZ/02 - 7941 leh Thiansuanpianga (21), Melbuk khalh truck MZ/01B - 7387 aṭangin bag 100 ve ve an man. Kuhva rah neitu chu Saikhumi (57), Melbuk nia hriat a ni. Kuhva rah hi Custom Preventive Force hnenah an hlan.

CMRF

Mizoram Fisheries Technical Service Association hruaitute chuan nimin khan chief minister Lalduhoma hnenah Chief Minister Relief Fund atan Rs 20,000 an chhunglut a; an hnathawhna chanchin leh an mamawhte Chief Minister hnenah hian an thlen nghal a ni.

GST sawiho

Sorkar laipuia Revenue secretary Sanjay Malhotra, GST Council Secretary ni bawk hoin nimin khan video conference kaltlangin Goods and Services Tax (GST) chungchanga thubuai awmte dan hnuaia mumal leh chak zawka bawhzui dan tur sawiho a ni a; state leh UT 27 aṭangin Chief Secretary leh Taxation Secretary ṭheuhte an tel.

Meth man

Zokhawthar Police leh Assam Rifles ṭangkawp chuan nimin khan Vawmkaw Lui, Zokhawthar chhehvelah joint operation an nei a, methamphetamine ni ngeia hriat kg. 3.45 leh pawisa Rs 17,49,500 an man a, a neitua puh Harich Uddin (40), Karimganj, Assam pawh an man nghal. Methamphetamine hi cheng nuai 44.87 man hua chhût a ni.

Road Safety Month

Lunglei District Level Road Safety Committee chu additional DC Donny Lalruatsanga hoin nimin khan an ṭhukhawm a, Lunglei South bialtu MLA Lalramliana Papuia'n a telpui. He hunah hian February thla chhunga Road Safety Month hman dan tur an sawiho a; Traffic Police-te kaihhruaiin NCC-te traffic duty dan zirtir nise, PWD leh Traffic Police-ten khawpui chhunga kawng khuar laite zirchiang se, an ti.