Mizoram leh Assam CM-in ramri sawi dun; "Intodelh ram nih kan tum dawn" - CM

Guwahati-a cham mek chief minister Lalduhoma chuan nimin zing khan Assam chief minister Himanta Biswa Sarma chu a chennaah kawmin ramri chungchang an sawi dun. Guwahati-ah vêk hian Lalduhoma hian February 8, Ningani khan PHD Chamber of Commerce & Industry-in 3rd Edition of Momentum North East, 2024 an buatsaih a hmanpui a, mahnia intodelh ram (state) nih tuma an beih dawn thu a sawi.

Mizoram CM leh Assam CM inkawmnaah hian ramri chingfel tura theihtawpa hmalak dun an rel. Assam CM chuan Assam State Assembly ṭhutkhawm lai a zawh hun remchang hmasaah Assam minister, ramri in-charge chu Mizorama a rawn tirh tur thu a hrilh.

Lalduhoma leh Himanta Biswa chuan ramri chungchanga state pahnihte kan inbiak chhung chuan a tu ve ve pawhin ramriah buaina siam loh nise, an ti.

3rd Edition of Momentum North East, 2024 a hmanpuinaah Lalduhoma chuan a kaihhruai sorkar chuan khuarei daih hmasawnna (sustainable development) nei turin kawng hrang hrangin hma a la chho ṭan tih sawiin, "Mahnia intodelh ram nih tumin kan bei dawn" a ti.

Chief Minister chuan loneitute thlai thar leisaka, an tana market nghet tak buatsaih turin hma an la nghal tih sawiin, "Mizoram leilung hausakna awm ang ang, a bikin mau leh medicinal plant lamte a hman ṭangkaina hria, thawkchhuak theite chu kan 'bana kaih' policy hmangin nasa takin ṭanpui kan tum," a ti a, huang hrang hrangah hmasawn theihna remchang a la tam thu a sawi.

Huang hrang hrang remchanna la awmahte hian mimal enkawl emaw, company-te chu a hlawkna tèl tlàn theih hmalakna nei tura sawmin Lalduhoma chuan, "Mizoram rawn tlawh ula, resources awmte rawn hmuin, mipuite nunphungte rawn hria ula, ram ralmuang leh mawi tak a ni tih mit ngeiin rawn hmu rawh u," a ti.

He hunah hian India ram hmun hrang hrang aṭangin industry leh company neitute'n an hnathawh leh hmalak theihnate an tarlang a; a ṭul ang zela inbe chhunzawm turin ruahmannate an siam.