Mipat hmeichhiatna hmanglai tihdarh vangin MSCW-in suo moto-in thubuai an ziaklut

Mizoram State Commission for Women (MSCW) chuan tun hnaiah Mizo hmeichhia ni ngeia ngaih pakhatin social media kaltlanga mipat hmeichhiatna lam hawi a tihchhuah avangin nimin khan suo moto-in thubuai an ziaklut a, video kawl zawng zawngte delete turin an ngen.

MSCW chuan mipat hmeichhiatna kaihhnawih video live-a tichhuaktu hi Instagram-ah chuan 'pui_puii_chhakchhuak' aka 'zolanu' tih nia a lan thu tarlangin, "Sex video hi sum hmuh nan a hmang nia ngaih theih turin a live sex video en duh tan man chawia en theihna a tlang­zarh hmasa niin a lang. Chumi hmang chuan ualau takin man chawitute hmuh theih turin mipat hmei­chhiatna mawi lo taka hman zui niin a lang. Chu thil chu social media platform hrang hrangah a darh ta a ni," a ti.

Thil thleng hi an ngaimawh takzet tih tarlangin MSCW chuan, "Hetianga ualau taka mipat hmeichhiatna hmang lai phochhuah leh thehdarh hi hmei­chhe zahawmna tih­bawrhbanna nasa tak a nih avangin suo moto-in thubuai ziahluh a ni. Hetiang thil hi a pawi hle a, dan palzutna lian tak a ni," an ti a, hetianga mipat hmeichhiatna chungchang social media-a vawrhdarh leh thawn darh hrim hrim hi dan palzutna lian tak, na taka hrem theih a nih thu an tarlang.

MSCW chuan hetianga mipat hmei­chhiatna hmangtu leh a hmanpuitu bakah social media account/platform lo hmantirtute lakah hian thubuai a rang thei ang bera lo ziaklut a, chhui zui ngai leh man ngaite lakah dan anga hma la zui vat turin Superintendent of Police, Cyber Crime, Aizawl an hriattir.

Hmalak dan kimchang hi he order tihchhuah a nih aṭanga ni sarih chhungin MSCW hnenah ziaka hriattir leh turin Cyber Crime SP, Aizawl chu an beisei.

MSCW tarlan danin, hetianga social media kaltlanga sex video tarlangtu leh hmangtute lakah hian suo moto case pawh an lo siam tawh ṭhin a, chu mi hmang chuan Mizo hmeichhia, chutianga sex video siamtute pawh police-in manin, lung inah khung pawh an lo ni tawh. Thubuai chhui zui lai pawh tunah hian a la awm.