Hniam taka bulṭana rei tak ding thei tura ngaihtuahna sèn a pawimawh - Commerce Minister

Commerce & Industries minister F Rodingliana chuan nimin khan Aijal club-ah Startup India leh Mizoram Startup Mission ṭangkawp buatsaih 'Accelerating Startup Callibre & Entrepreneurial Drive (ASCEND) Financial Literacy Bootcamp, Mizoram Edition' a hmanpui a, hniam taka bulṭana rei tak ding thei tura ngaihtuahna sen a pawimawh thu a sawi.

F Rodingliana chuan, ASCEND Financial Literacy Bootcamp chu start-up a nih angin ropui taka bulṭan a kawk lo tih a sawi a, "Hniam taka bulṭana rei tak ding thei tura ngaihtuahna seng a pawimawh. Entre­preneurship lamah Mizoram chu bulṭan tir leh hma la chho ve mek zel a ni a, sorkarin 'Bana Kaih - Hand Holding Policy' chu sorkar laipui scheme-te nen ṭangkawpin kalpui a tum a ni," a ti.

Mizoramin ram ṭha tak a neih thu leh bulṭana hmalakna tur ram âwl zau zawk nei tura ngaihtuah hman a ṭul thu sawiin Commerce Minister chuan, "Ṭhalaite'n ngaihtuahna thar neiin, hmasawn tumin theihtawp chhuah ang che u. Policy pawimawh hrang hrangte mipuite'n zau zawka an hriat theih nan sorkarin ngaihtuahna a seng mek a, hmalakna reng rengah sorkarin thawhhona a ngai pawimawh," a ti a; bootcamp chhimtute chu mithiam tak takte zirtirna ṭha taka ngaithlaa ṭangkaipui tum ṭheuh turin a chah a ni.

Planning department chuan Mizorama chak zawka Entrepreneurship Development Scheme (EDS) kalpui turin kum 2017 khan Entrepreneurship Development Centre (EDC) a din a, August 30, 2022 khan Mizoram Startup Mission tia thlak a ni. Hemi kaltlang hian DPIIT recognised startup 22 neih a ni tawh a, Women Entrepreneur 35-te eizawnna ngelnghet nei thei tura chherchhuah an nih tawh bakah, hmalakna hrang hrang kaltlangin mi 5,000 chuangin eizawnna an nei tawh.

Hmalakna zingah hian IT services, food processing units, health services, textiles, handloom & handicrafts-te chu hmalakna langsar zualte an ni.