Vairengte leh Sairang inkar kawng enfiah

Public Works depart-ment (PWD) minister Vanlalhlana chuan nimin khan Vairengte leh Sairang inkar kawngpui national highway (NH) 06 & 306 a enfiah a, PWD hotute leh NHIDCL aiawhte nen kawng chhe lai siamṭhat dan tur an sawiho.

Vanlalhlana chuan, Vairengte - Sairang inkar kawngpui chu Mizoram mamawh châkkhài lâk luhna kawngpui pawimawh ber pakhat a nih avangin siamṭhat thuai a ṭul thu a sawi a, "Lirthei lian thil rit tak tak phurin a zawh reng a nih avangin a chhe chak hle a, kumin fur thlen hma ngeia thawmṭhat hna thawh zawh hman a nih theih nan he lai kawng siamṭha tura hmalakna awm mek hi chak zawkin kalpui ang che u," a ti a, contractor-te chu kawng siamṭhat nan lungchang ṭha leh hmanraw ṭha chauh hmang turin a chah.

Vairengte aṭanga Sairang inkar kawng hi km 122-a thui niin; km 67.20 chu NHIDCL kutah leh km 54.80 chu Mizoram PWD kutah a awm a ni.

Kumin fur hma hian PWD leh NHIDCL hnuaia kawng awmte hi ngawrh zawka siamṭhat tuma hmalak mek a nih thu sorkar thuchhuahin a tarlang.