BJP an sorkarna apiangah kan Kristian puite nekchepin an awm zel - MPCC Treasurer

MPCC chuan nimin khan Congress Bhavan-ah political session an nei a, thusawitu MPCC treasurer Dr Lalmalsawma Nghaka chuan BJP an sorkarna apiangah kan Kristian puite nekchepin an awm zel niin a sawi.

Dr Lalmalsawma chuan Uttarkhand-ah February 7, 2024-a an chief minister Pushkar Singh Dhami-in Uttarakhand Uniform Civil Code Bill a put luh hnuah an pawm tak thu sawiin, "Uttarakhand-ah chuan kan vei em em UCC hman a ni tawh a, keini Mizo Kristiante hi kan inngaihtuah chian a ngai tawh hle. Mizoramah him reng nia kan inhriat laiin zawi zawiin nek hret hret kan nia, chimral kan ni thei dawn. He thil hi Congress chauh ni loin, MNF leh ZPM-te pawh hian ngun takin ngaihtuah rawh se," a ti.

BJP te foundational agenda-te zing a lianzual pathumte chu - Ram Mandir, Ayodhya a din, Article 370 abrogation (nuaibo) leh India rama UCC siam a ni thu sawiin MPCC Treasurer chuan, "Pahnih an ti hlawhtling tawh a, pakhat hi tihhlawhtlin hmabak a ni. Sakhaw Zalenna duhtute leh Mizoram mipuite pawh ka ngaihtuahna kan hman uluk chhoh hle a ngai a ni," a ti a, Congress Party chu India ram mipui te nekchepa awma an dikna chanvo humhim tura din a nih thu a sawi.

MPCC Treasurer chuan tunlaiin India leh Burma inkarah daidanna bang siam tum thu a lar hle tih sawiin, "Free Movement Regime min tihtawpsak tawh. Hei hi hmun hrang hrang Zofate zawi awia dan hmanga min daidan tumna a ang riau, daidanna bang avanga ṭhenhran kan nih chuan a hnam pum angin a pawi hle dawn a ni. Nagaland CM chuan ram mipuite min rawn hmasa rawh se a ti a, kan CM hian a ti ve thei dawn em?" a ti.