Minister-in Meichher Award 2023 a sem

School Education minister Dr Vanlalthlana chuan nimin khan School Education Directorate conference hall-ah 'Meichher Award 2023' a sem.

Dr Vanlalthlana chuan, kum 1975 aṭanga vawiin thlenga mei mit loa thlakip chhuak Meichher chanchinbu kalpui ngar ngar a ni chu ropui a tih thu a sawi a, "Meichher hi Mizoram tana finna tuikhur mi tin thàl phâk a nih theih zel ka beisei. Thu leh hlate inngaihhlut leh inngaihpawimawh sak tawnna hian ziak miteah phùrna leh chona a pe ṭhin a, vawiina lawmman dawngtute taimakna leh inpekna hi a chhuanawmin, tawpsan mai lo ang che u," a ti a; Meichher chanchinbu kalzelna turah duhsakna a hlan nghal a ni.

Meichher chanchinbu hi kum 1975 March & April thla aṭangin 'Zoram Eng' tih hming pua chhuah a ni a; kum 1975 October thla aṭangin 'Meichher' tia thlak a ni. Kum 1975 March & April thla chhuak aṭanga chhiarin January 2024 thlengin bu 791 tihchhuah tawh a ni a; sorkar sum sengin thla tin bu 3,000 zel tihchhuah a ni a, a thlawna sem ṭhin a ni.

Meichher Award 2023 hi Directorate of School Education hnuaia Adult Education Wing buatsaih niin, School Education department buatsaih thla tin chhuak Meichher chanchinbua thu leh hla ziak ṭha mi pathum hnenah 'Meichher Best Article of the Year' leh thu leh hla thawh hlawk mi pasarih hnenah 'Meichher Best Contributor of the Year' hlan a ni.

Chawimawina dawng­tute hian citation bakah pakhatnain Rs 3,000, pahnihnain Rs 2,000 leh pathumnain Rs 1,000 ṭheuh an dawng a ni.