MNF hi ram leh hnam tana din a ni - MLP Secretary

MNF chuan nimin khan an pisa-ah chhung inkhawm an hmang a, thusawitu MNF Legislature Party (MLP) secretary R Rohmingliana chuan MNF chu ram leh hnam tana din a nih thu a sawi.

R Rohmingliana chuan in sa tura a foundation a pawimawh ang thoin political party-te pawhin foundation an neih vek thu sawiin, "Party tin foundation hi kan chhui chian a ngai. Congress Party chu vai rama inṭan a ni, central-a an hniam chuan Mizoramah pawh an hniam zel. BJP pawh Congress ang tho an ni," a ti.

Sorkarna siam mektu ZPM-te eng ang nge an nih hriatchian a pawimawh tih sawiin MLP Secretary chuan, "An foundation chu party hrang hrang kalkhawm an ni. Founder president pawh an nei lo. An MLA-te pawh inthlan dawna an sawm khawm chawp an ni," a ti a, an kalthui vak a rin loh thu a sawi.

R Rohmingliana chuan MNF chu Mizopa chhul chhuak, Mizorama din, 'Ram leh hnam tan - Pathian leh kan ram tan' ti an nih thu sawiin, "Tluk sawp lai awm mah se, engtik niah emaw chuan a thochhuak leh ang. Kan foundation a dik avangin party dangte chhungrila inbeihna ang hi a awm ve lo. A foundation a that hle rual hian a dawttua hruaitu turte kan pawimawh," a ti.

Ṭhangtharte zingah Mizoram hi chhe lailet dera inzirtirna a awm nia sawiin R Rohmingliana chuan, "Pawi ka ti hle. Kristian kan nihna hi kum za awrh chauh a la ni. Vawiina an tehkhin thin chu ram changkang leh state upa tawhte an ni. Keini chu 1986-ah state kan ni ve chauh," a ti a, infrastructure lian kan neihte a ropui thu a sawi.