Sorkar hnathawkte'n awm hmun nghet an nei thei lo - Health Minister

Health & Family Welfare minister Lalrinpuii chuan nimin zing khan Hnahthial District Hospital a tlawh a; sorkar hnathawkte'n awm hmun nghet an neih theih loh thu sawiin, mipui tana rawngbawl an ni tih inhre renga sawn an nihna hmun apiangah lungawi taka awm thei turin a chah.

Lalrinpuii chuan, National Health Mission hnuaiah District Hospital 10-ah thisen/zun etc test-na laboratory changtlung tak din tuma hmalak mek a nih thu a sawi a, "A thawh khatna atan Siaha, Champhai leh Hnahthial district-ah hmalakna hmasa neih mek a ni a, thawktu indaih loh zualna phuhruk turin zirchian mek a ni. Sorkar hnathawkte'n awm hmun nghet an nei thei lo, mipui tana rawngbawl an ni tih inhre renga sawn an nihna hmun apiangah lungawi taka awm theih tur," a ti.

Zoram Medical College thuamṭhat nan Chief Minister-in immediate relief atan cheng vaibelchhe 1.4 a ruahman sak thu sawiin Minister chuan, "Health sector lama harsatna tam tak a phuhruk theih ka beisei. Hnahthial-ah District hospital changtlung tak cheng vaibelchhe 17 man sak thuai tura peihfel a ni tawh," a ti a, Health & Wellness Centre pawh Hnahthial Electric Vengah sak a nih dawn thu a sawi.

Lalrinpuii chuan ZMC chu hospital changtlung leh thianghlim tak a nih thu leh mipuiin pan tam se a duh thu a sawi a, "Civil Hospital Aizawl chêp lutuk tih zangkhai phah nan leh thawktute indaihzai zawk nan mipuite'n ZMC pan nachang hre zual zel se," a ti.

South Tuipui bialtu MLA Jeje Lalpekhlua pawhin thu sawiin, damdwi-ina thawktute chu hriatthiamna nen damlote lo dawngsawng ṭhin tur te, mi bawrhsawm leh rethei zawkte tana ding fo ṭhin turin a sawm.