Education Minister-in neitu rilru pua sorkar sikulte enkawl turin khawtlang hruaitute a sawm

School Education minister Dr Vanlalthlana chuan February 8, Ningani khan Lunglei Zohnuai, Haulawng leh Sialsuk khuaa sorkar sikul hrang hrang a tlawh a; "Neitu nihna rilru pu khawtlang a piangah sorkar sikulte an ṭha bik," a ti.

Dr Vanlalthlana chuan khawtlang hruaitute leh zirtirtute kawmin, khawtlang hruaitute chu neitu rilru pu chunga an veng leh khaw sikulte enkawl turin a sawm a, "Neitu nihna rilru pu khawtlang a piangah sorkar sikulte an ṭha bik a, zirtirtute pawhin khawtlang hruaitu leh tlawmngaipawlte thawhpui thiam ang che u," a ti.

Sikul hrang hrang a tlawhnnah Minister chuan, "Sorkar laipui scheme pakhat Vidyanjali chu Mizoramah ṭha taka kalpui ve a ṭul a, he scheme kaltlang hian khawtlang mipuite, sikul aṭanga zir chhuak tawh te leh zirna atana ṭhahnem ngaite'n an thiamna bakah bungrua leh ṭul dangte sikul tan an pe thei. Mipuite'n sikul hi vantlang ta a nihna an hriat thiam pauh leh sikul hmawsawn nan ṭhahnem an ngai ṭhin," a ti a, hei hian sikul tan rah ṭha a chhuah ṭhin thu leh a tawpa chhawrtu chu khawtlang leh ram tho a nih thu a sawi.