Lalnghinglova leh Union Sports Minister inkawm

Sports & Youth Services minister Lalnghinglova Hmar chuan nimin khan New Delhi-ah Union Sports minister Anuraj Singh Thakur a kawm. Union Sports Minister chuan Mizoram chu sports lamah ṭan la zel tura chahin, a thawk ṭhate tan sorkar laipui a inhawn reng thu a lo hrilh.

Lalnghinglova Hmar chuan Union Sports Minister hnenah hian Mizoramin sports lamah hma a sawn zel theihna tura pawimawh chu Aizawla SAI Centre hi Imphal-a North East Regional Centre aṭanga Guwahati Regional Centre hnuaia dah a nih thu a sawi a; Union Minister chuan Aizawl SAI Centre chu Guwahati hnuaiah dah a nih tur thu a sawi.

Khelo India hnuaia sports infrastructure siamna atan Mizoramin tun hnai kum hnih chhungin project pakhat chiah a dawn thu leh pek belh tura Tetea Hmar-in a ngen chungchangah Anurag Thakur chuan pek a nih tur thuin a chhang a; Mizoram chu sports lamah ṭan la zel tura chahin, a thawk ṭhate tan sorkar laipui a inhawn reng thu a lo hrilh a ni.

Lalnghinglova Hmar chuan India ramin kum 2036 Olympics thlen a tum chu lawmawm a tih thu a sawi rualin, infrastructure siam ringawt a tawk loh thu te, tun aṭanga infiammi inbuatsaih a ṭul thu leh a hmanhmawhthlak tawh thu a sawi chu Union Minister chuan ṭha a tih thu a hrilh a; February 19, 2024-ah hmarchhak state hrang hranga Sports Minister-te inrawnkhawmna buatsaih nghal a tum tur thu a sawi bawk.