Mizorama hmasawnna hrang hrang kan hmuhte Central hmalakna deuh vek - Vanlalhmuaka

Mizoram BJP chuan nimin khan an pisa-ah political session an hmang a, Mizoram BJP president Vanlalhmuaka chuan Mizorama hmasawnna hrang hrang kan hmuhte chu central sorkar hmalak­na deuh vek a nih thu a sawi.

Vanlalhmuaka chuan Aizawl khawpui chhung traffic jam tih ziaawmna tur atana central hmalakna Aizawl by-pass road pawh tute emaw chuan an party hmalakna anga sawi ta mai mai tih sawiin, "Sorkar hmasa an rin loh vanga tun sorkara rawn release ta anga mipui hnena puang zar an awmte hi a makin, Mizoram mipuite pawh hian thudik leh thil dik kan hriat ve hi a hun tawh a ni," a ti.

MJBP President sawi danin, inkalpawhna kawngpui Mizoram a siamna tur kan hmuh mek, Aizawl to Tuipang te, Seling to Dulte te, Keifang to Tuivai te, Silchar to Sairang four lane-te leh a dang pawh Mizoram sorkar zawk hian kan thawhpui ṭhat loh avangin hna a kal chak thei lo. Tun sorkar mek pawh hian heng hnathawh tur hrang hrangte hi enfiah pui a, harsatna awmte an chinfel vat loh chuan kawngpui siam hna pawh hi duh angin a kal chak thei dawn lo.

Central-in kawngpui tha minpek an tum a, keini erawh chuan central sum aṭanga hlawkna lo lak a, dik lo taka compensation duh vanga kan buaite hi a Kristian loin, a zahthlak hle a ni.