Champhai district-a Home pathumah naupang venhim ngai bik leh dan bawhchhia 655 enkawl mek an ni

Mission Vatsalya hnuaia Champhai District Child Welfare and Protection Committee chu additional DC M Misael kaihhruaiin February 8, Ningani khan DC conference hall-ah an ṭhukhawm. Champhai district-a Home pathumah naupang venhim ngai bik leh naupang dan bawhchhia 655 enkawl mek an nih thu tarlan a ni.

He huna tarlan danin Champhai district-a naupang venhim ngai bikte chu Rose Children Home leh Genesareth Gospel Home-ah dah an ni a, naupang dan bawhchhiate chu Champhai Observation Home-ah dah an ni thung. He'ng Home pathumah hian naupang 665 awmin, mipa naupang 381 leh hmeichhe naupang 284 an ni. Naupang venhim ngai leh harsatna tawk an awm chuan helpline number 1098-ah biak theih reng a ni.

Kum 2015 aṭangin naupangte hnenah ṭanpuina Rs 4,000 zel pek ṭan a ni a, naupang 398 hnenah pek tawh niin, tunah hian 130 pek tura ruahman mek a ni.

Child Welfare Committee hnuaiah kum 13 (2011-2024) chhungin case 1,004 a awm tawh a, kum 2014-2015 chhung khan CWC hnuaiah case 146 awmin, kum 13 chhunga case neih tam ber ṭum a ni. Kum 2021-2022 chhung khan case 28 awmin a tlem ber ṭum a ni a; kum 2023 aṭanga January, 2024 thleng khan case 36 a awm tawh bawk.

Juvenile Justice Board hnuaiah kum 13 chhungin case 435 a awm tawh a; kum 2015-2016 chhung khan case 56 awmin a tam ber a, kum 2020-2021 chhung khan case 18 a awm a, a tlem ber ṭum a ni. Kum 2023 aṭanga January 2024 chhung hian case 26 a awm tawh nawk a ni.