Khawpuia hmasawnnate thingtlangah a awm ve theihna atan ṭan lak a pawimawh - RD Minister

Rural Development minister Prof. Lalnilawma hoin nimin khan MLA conference hall-ah RD officer-te'n an hmalak dan thlirletna an nei. RD Minister chuan, "Khawpuia hmasawnna leh thil thar awmte chu thingtlangah pawh a awm ve theih nan ṭan kan lak a pawimawh," a ti.

Prof. Lalnilawma chuan, Mizoram hmasawnna tura department pawimawh ber an nih angin thingtlang mipuite khawsakin hma a sawn em tih leh danglamna a thlen em tihah ngaihtuahna an hman fo a ṭul thu a sawi a, "India ram pum huap rural population chu 60% a nih laiin, kan ram chu 48% vel rural area-a awm kan ni a, chuti chung chuan kan ram thingtlang leh khawpui inkar chu a la inthlau hle. Khawpuia hmasawnna leh thil thar awmte chu thingtlangah pawh a awm ve theih nan ṭan kan lak a pawimawh hle," a ti a; an department leh schemes-te chiang tur leh schemes hnuaia fund-te dik tak leh a nihna ang taka hmang ṭhin turin officer-te a chah.

Thingtlang mipuite khawsak phung chu chàwikàn a nih ṭheuh theih nan rilru thar leh thâ thar nen theihtawpchhuah chhuah tura kalkhawmte chahin RD Minister chuan, "Retheihna leh ṭam umbo tura UN Sustainable Development goals-in min phût anga a tihlawhtling theitu pawimawhte zinga mi kan ni a, kan hmalakna chu thil tereuh tê tê aiin thil lian tham leh hriat tham deuh, khawtlang tan pawha rohlu ni thei se," a ti a, hnathawh quality compromise loin department dangte nen thawhho dan dap uar a ṭul thu a sawi.

He hunah hian RD Block hrang hrangte'n RD Schemes hnuaia hna an thawh dan sawiho niin, hmalakna leh hmachhawp hrang hrang tarlan a ni.