KHAWTHLIR

Thisen pe

Nimin khan pawl pathumin damdawi-in hrang hrang tan thisen an pe. Salvation Army Youth, Serchhip chuan Serchhip Blood Bank-ah thisen unit 9 an pe a, a petute chu mipa pariat leh hmeichhe pakhat an ni. Missionary Training College, Mission Vengthlang zirlaite leh an zirtirtuten Synod Hospital blood bank tan thisen unit 25 an pe a, thisen hi mipa 21 leh hmeichhe paliin an pe. J Thankima College NSS Unit chuan Civil Hospital, Aizawl tan thisen unit 87 an pe a, a petute hi mipa 60 leh hmeichhia 27 an ni.

Museum tlawh

Art & Culture minister C Lalsawivunga chuan nimin khan State Museum a tlawh a, thawktute kawmin museum tihchangtlun dan tur a sawipui. Minister chuan, "Mizo hnam rohlu vawnhim leh chhawm nun kawngah theihtawp chhuah zel ula, ṭan la sauhsauh ang che u," a ti.

Khaw 25-ah hma la dawn

Aizawl district Nasha Mukt Bharat Abhiyaan (Drug Free India Campaign) hnuaiah Aizawl district-a veng/khua 25-ah hmalak a ni dawn a; hemi chungchangah hian Aizawl DC Nazuk Kumar chuan DC conference hall-ah MHIP hruaitute a kawm a, he'ng khua/veng 25 hi Near Drug Free Village-a puang thei tura hmalakpuiah a sawm. Drug Free India Campaign hi Aizawl disrtict-a zirna-in, kohhran leh a bik takin hmeichhiate zingah kalpui chhoh mek a ni.

Ruihhlo do sawiho

Siaha District Level Task Force on Ruihhlo Do chu nimin khan additional DC Lalnunmawii kaihhruaiin an ṭhu­khawm a; sikul leh kohhran-a ruihhlo ti lo tura inzirtirna kalpui ṭhin chu chhunzawm zel ni se, an ti.

Ruihhlo hluar Veiawm ti

Foundation For Drug-Free, Mizoram chuan an patron member Assembly speaker Lalbiakzama lawmpuina a pisa-ah an hlan. Lalbiakzama chuan Mizorama ruihhlo hluar veiawm a tih thu sawiin, awl mai maiin ruihhlo tihna kawng a hawnsak avangin ṭhalaite chu awm awl mai mai lo turin a chah.