Sorkarin buhfaiah subsidy zat a ennawn dawn; ration card-ah politics a inrawlh tur a ni lo - FCSCA Minister

Food Civil Supply & Consumer Affairs (FCSCA) minister B Lalchhanzova chuan February 10, 2024 khan Aizawl Press Club-ah thuthar thehdarhtute kawmin, sorkarin ration card var neite tana buhfaia subsidy a pek zat ennawn a nih tur thu leh ration card-ah politics a inrawlh tur a nih loh thu a sawi.

B Lalchhanzova chuan January 2024 a buhfai leina senso atana hman zat chu cheng vbc. 15.69 a nih thu sawiin, "Heta sorkarin subsidy atana a senso zat chu cheng vbc. 7.47 a ni a, transportation cost-ah cheng vbc. 6 vel sen a ni. Chuvangin, hmuh let tawh lo tura sorkarin a senso zat chu thla khatah cheng vbc. 13.47 tihna a ni," a ti.

Ration card var neite hnena subsidy pek ṭhin ennawn a nih dawn thu sawiin FCSCA Minister chuan, "Subsidy atana sum sen thla khatah cheng vbc. 3 vel tala tihhniam kan tum," a ti a, card var nei mek zingah dinhmun harsa an la awm chuan National Food Security Act (card eng leh card pawl) huangah sawn luh an nih dawn thu a sawi.

FCSCA Minister chuan National Food Security Act-in a huam zingah dinhmun ṭha deuhte pawh a awm theih thu sawiin, "Chungte chu card varah kan sawn ve thung ang. Card thlak danglam ngaite tan February 2024 chhung DCSO-te hnenah in report theih a ni ang. Uluk takin chungte chu zirchian a ni ang a, an awmna tur dik takah dah kan tum," a ti.

Ration card chu politics khelhna atan leh party induhsakna atana hman chi a ni lo tih sawiin B Lalchhanzova chuan, "Politics thil avanga an dinhmun ngaihtuaha an ration card ang tur ni lo neite an awm palh thei, chu'ng chu kan siamṭha dawn," a ti a, chhung tinte ration card neih dan chu Food Security Act-in a phut angin buhfai semna dawr bulah tar an la tum thu a sawi.

FCSCA Minister sawi danin, tun dinhmunah Mizoramah ration card nei chhungkaw 2,86,362 an awm a, ration card-a chuang mi 11,67,024 an ni. Ration card zingah hian card eng 25,811, card pawl 1,48,711 leh car var 1,11,840 a awm.

Ration card eng (AAY) chuan chhungkua/mimal dinhmun ngaihtuahawm taka khawsa, a thlawna buhfai dawn loh chuan eitur tlachham mai thei dinhmuna ding, sum thawk chhuak tura theihna nei sang lo, rualbanlo, inhlawh chawpa nung ve ṭawk ṭawk, chhan hran hrang hrang avanga dinhmun ngaihtuahawma dingte a huam dawn.

Ration card pawl chuan AAY-te aia tlema ngaihtuah awm lo deuh, sorkar puihna tel loa buhfai eikhawp lei zo lo. Chhungkaw khawsak dan leh sum lakluh dan aṭanga teh a, chhawmdawl mamawh, vantlang ang pawha puihbawm ngaiho a huam dawn.

Vanglaini zawhna chhangin B Lalchhanzova chuan, "Ruahman dan chuan ration card var hi category hniha ṭhen kan tum a, category pakhat chu a nei zual tak tak an ni ang a, sorkarin buhfaiah subsidy a pe dawn lo. Kg 1 Rs. 34 a kan lei chuan chumi zat chuan an khul ve mai ang. Category pakhat zawk chuan Rs. 34-a kan lei chuan Rs. 27 velin an khul ang," a ti a, hei hi thutlukna erawh a la nih loh thu a sawi.