MS Academy-in zirlai hlawhtlingte chawimawi; Dr Vanlalthlana hnenah cheng nuai 1 an hlan
MS Academy (A Coaching Centre for Competitive Exams), Khatla chuan February 9, Zirtawpni zan khan Hyve Hall, Aizawlah an zirlai 19, MPSC Competitive Exams 2023 leh DSWO Exams 2023 a hlawhtlinna changte lawmpuina hun an buatsaih a, khuallian HTE minister Dr Vanlalthlana, Aizawl North-II bialtu MLA hnenah an bial chhunga special library tihchangtlunna atan Rs 1,00,000 an hlan nghal.
Dr Vanlalthlana chuan MS Academy zirlai hlawhtlinna changte chu a lawmpui thu sawiin, zirlai hlawhtlinna changte chu kutleh lam thawhtu Pathian leh an nu leh pa, ṭhiante bakah an zirlai zinkawnga puitute hrereng turin a chah a, "Mirethei zawkte ngaihsak leh an nat ruala nat pui theitu, khawtlang leh kohhran tana mi ṭangkai lehzual nih tum ang che u," a ti.
Nakin zelah an hnathawh danah an chanchin engtin nge miin an sawi chhunzawm dan turah fimkhur tura chahin Dr Vanlalthlana chuan, "Sorkar hnathawk tan hausak thut leh hausak em em a theih loh avangin sum ruahman dan fel tak neih a ṭul. Nihna baka lan tum loh tur," a ti a, hlawh an lak hunah awmze neia uluk taka an hlawh hmang turin a chah.
Khualzahawm MYC chairman Malsawmzuala Ralte chuan zirlai hlawhtlinna changte hnenah fuihna thuchah sawiin, MYC aṭangin Rs. 5,000 a hlan nghal.
MS Academy hian kum 2022-a Aizawl North-II bial chhunga din 'Special Library for Civil Services Examination' hmasawn zel nan leh zirlaiten an hlawkpui ngei theih nan hmalatu leh hawngtu Dr Vanlalthlana hnenah Rs 1,00,000 an hlan.
MS Academy hi August 9, 2019-ah hawn a ni a, state competitive exams (group A & B) turte tan coaching pek a ni.
Tun dinhmunah aspirant 3,254 in mentoring programme, test series, mains crash course, prelims cum mains, group B gazetted & non-gazetted coaching class an zawm tawh a ni.