Bank-te'n an hnena loan diltute an rin ngama loan an pek theih nan duhsak bik kan nei dawn lo - CM

Chief minister Lalduhoma chuan Mizoram sorkarin bank-te'n an hnena loan diltute an rin ngam a, uar lehzuala loan an pek theih nan party mi leh sa duhsak tura ngenna emaw, beneficiary atana lo thlan bik ang chite a kalpui ve dawn loh thu Union Minister of State for Finance Dr Bhagwad Karad a hrilh.

February 10, Inrinni khan Chief Minister hian New Delhi-ah Union Minister of State for Finance Dr Bhagwad Karad chu a chenna-inah a kawm a; "Mizoram sorkarin bank-te'n an hnena loan diltute an rin ngam a, uar lehzuala loan an pek theih nan party mi leh sa duhsak tura ngenna emaw, beneficiary atana lo thlan bik ang chite a kalpui ve dawn lo," a ti a, Mizoram Rural Bank hnuaia thawkte allowances chu SBI-a thawkte allowances nen inanga pe turin a ngen nghal.

Lalduhoma chuan, Mizoram Rural Bank chu Mizorama bank inzarpharh zau ber leh mipuite pawhin an chhawr nasat a nih thu a sawi a, "An CD Ratio pawh a ṭha ṭhin hle a, chuvang chuan thawktute allowances hi a sponsor bank SBI-a thawktute allowances zat pek ve ni se. Mizorama bank awmte, a bikin Regional Rural Bank-te'n thawktu indaih lohna an tuar nasa," a ti a; Mizoram tan emaw India hmarchhak puala Regional Rural Bank-a thawktu tur lak runpui, special recruitment kalpui turin Union MoS a ngen.

Sorkar laipuiin Interim Budget aṭanga a lan dana SASCI atan sum tam zawk ruahman a tum chu lawmawm a tih thu sawiin Lalduhoma chuan, "Mizoram tana kalpui dan awlsam zawk (special dispensation) awm thei se. 16th Finance Commission funding dan turah pawh chhiah lakkhawm tur (revenue mobilise) nei tam lo tak kan nih avangin Mizoram chu special category state-ah dah chhunzawm turin ka ngen che a ni," a ti.

Dr Bhagwad Karad hian Chief Minister thil thlente chu an pawimawh hlawm hle tih sawiin, Chief Minister awm lai ngei hian February 16, 2024-a bank kaihhnawih official-te telna tur meeting kohna a tichhuak nghal niin sorkar thuchhuahin a tarlang.

Union Minister hnena CM thu thlen dangte

• Mizoramah private bank-te an pung a, a lawmawm rualin thingtlang lamah an inzarpharh zau loh avangin mipuite'n an chhawr ṭangkai tawk lo

• Zau zawka private bank-te an inzarpharh theih nan hma laksak turin a ngen

• Private bank awmsate hian anmahni (local branch)-in sanctioning power an neih loh hlawm avangin hna an thawk chak theih loa, loan diltute'n harsatna an tawk ṭhin.

• Mahnia sanctioning power neia an awm theih nan private bank thuneitu sangte ngensak turin a ngen

• Bbank ṭhenkhatte'n an hnena loan diltute Income Tax Returns an lo phût ṭhin a, Mizoram chu income tax pek lohna state a nih angin bank-te pawhin lo phut tawh lo thei se

• Mizorama bank tam zawkten Credit Deposit Ratio an nei hniam hlawm hle a, mahni target tlin thei lo an tam hle

• Mipuite pawisa tlingkhawm hi mipuite tan vêk CD Ratio ṭha zawk kan beisei tlat