Minister-in food processing training hmanpui

North Eastern Regional Agricultural Marketing Corporation hnuaia Cluster Based Business Organisation Clover Organic Pvt. Ltd. chuan February 10, Inrinni khan Aizawl Chanmari-a an office-ah Food Processing training an huaihawt a; Agriculture minister PC Vanlalruata'n a hmanpui.

PC Vanlalruata chuan, ZPM sorkarin entrepreneur-te a ngai mawimawh dawn tih a sawi a, "A ṭul ang zela khai chhuah hi kan tum zel dawn a, hmasawn zel turin theihna kan neihte hi chhawr ṭangkai zel ang u. Agriculture dept-in vawiina kan thawhpui ṭha tak, kan service provider-te pawh ṭan laa thiamna neite leh kan kut hnathawktute tan ṭan la leh zual turin ka chah duh che u a ni," a ti.

Karleha budget session neih turah hian hand holding policy atan sum dah a ni dawn tih sawiin Agriculture Minister chuan, "Ṭan kan la ho zel dawn a, tuna training chhuakte pawh bulṭan chauh kan ni tih a hria," a ti a, ram leh hnam tan nasa takin ṭan la lehzual turin a chah.

Food Processing training hi ni li chhung awh tur niin, CSS- Formation and Promotions of 10,000 FPO Scheme, Phase II, Mizoram a Farmer Producer Company (FPC) pasarih - Lengteng FPC, Ngopa Block, Langkaihruam FPC, Zawlnuam Block, Hmuifangtlang FPC, Aibawk Block, Chalfilh FPC, Darlawn Block, Tlaizawng FPC, Tlangnuam Block, Serlui FPC, Bilkhawthlir Block leh Tuirini FPC, Thingsulthliah Block aiawhte an tel.

Training-ah hian lemon ginger squash, ginger candy, papaya candy, orange juice, orange squash, orange peel candy, orange marmalade, gourd pickle, banana chips, tomato ketchup leh tomato chutney-te siam an zir dawn a ni.