Ram tan a ṭha thei ang ber thlen kan tum - PWD Minister

Public Works department (PWD) minister Vanlalhlana chuan February 10, Inrinni khan Mizoram PWD hnuaia Kolasib district-a hna thawh hrang hrang a enfiah a; Mizorama sorkar thar chuan ram tan a ṭha thei ang ber thlen an tum thu a sawi.

Vanlalhlana hi PWD hnuaia hna hrang hrang a tlawhnaah contractor-te'n an lo dawngsawngin an hnathawh chin an lo hrilhfiah a; Bairabi PWD IB-a an inkawmhonnah PWD Minister chuan contractor-te chu ṭha tak leh chak zawka hna thawk tura chahin, "Sorkar thar a lo piang a, mipuiin beiseina an nei sangin mipui an hlim a, ram tan a ṭha thei ang ber thlen kan tum. Ministry-in mipui thlawpna kan dawng tih kan hriatnain chakna min pe a ni," a ti a, thawhhona ṭha tak nen hmasawnna hmuh tur a awm zel dawn thu a sawi.

Kolasib bialtu MLA Lalfamkima, deputy speaker chuan PWD Minister-in Kolasib district-a PWD hna hrang hrang a hmun ngeia a en chu lawmawm a tih thu a sawi a, "Kawng ṭha nei turin sorkar ram lâk tawh chhuahsan chungchangah mipuite thawhpuina leh thu awihna a pawimawh. Mipuite chu ṭha taka sorkar hmalakna thlawp turin ka ngen," a ti a; sorkar hotute'n ṭhahnem ngai leh ṭha takin hma an la chho dawn tih sawiin, an hma lakna ngaichang thiam turin mipuite a chah bawk.

Bairabi PWD IB-a inkawmhonaah hian Bairabi khawtlang hruaitute leh mipuite'n Minister leh Bialtu MLA hnenah hian an mamawhte an lo thlen a; Hortoki-ah pawh khawtlang mamawh hrang hrang sawiho a ni.

PWD Minister hian PWD NH Division-III hnuaia hna thawh hrang hrang - cheng nuai 5,310 senga NH-154/6 Kolasib - Bairabi kawngpui (km 89 - 105) siamṭhat leh zauh hna thawh mek te, cheng nuai 1,111 senga Bairabi bul Tlawng kam venhimna tur River Training Work Phase-I hna thawh mek te, cheng nuai 4,136 senga Meidum - Hortoki kawng phase-I (km 9.10) siam hna thawh mek bakah, PWD Kolasib Division hnuaia cheng vbc 133.66 senga Meidum - Hortoki kawng phase-II (km 9.10-26) siam hna leh lei (bridge) dawh hna thawh mek leh Rengtekawn - Bawktlang Sub-Station kawng siamṭhat hna thawh turte a tlawh a ni.

He'ng hna chungchanga harsatna awmte leh hmalak chhunzawm zel dan turte sawiho a ni a; kawng siam hna leh lei (bridge) dawh hna thawh chhunga mipui veivakte'n harsatna an tawh lohna tur leh fur ruah tui tlak huna harsatna a awm loh nan ruahmannate an siam.

Sorkar thuchhuah tarlan danin, Meidum - Hortoki kawng siam hna phase-I (km 9.10) hi physical work 79.49% leh phase-II (km 16.90)-ah earthwork leh permanent work package 4 awmin 91% thawh zawh tawh a ni a, pavement hna thawh ṭan mek a ni.

Lei dawh tur pali zinga Chhimluangte lui leh Dumkhel lui kaina lei dawh hna chu 23% ve ve thawh zawh tawh niin, Bulung lui leh Damdiai lui kanna lei dawh tur pawh thawh ṭan mek a ni. Bairabi-a Tlawng lui kam ven himna tur River Training Work Phase-I chu group 4-ah ṭhen a ni a, group-I, III leh IV thawh zawh tawh niin, group-II ah 89.01% thawh zawh tawh a ni bawk.