Health Minister-in National Deworming Day hmanpui

Health & Family Welfare minister Lalrinpuii chuan February 10, Inrinni khan Hnahthial Electric Vengah ‘National Deworming Day, February Round' khuallian niin a hmanpui a; South Tuipui bialtu MLA Jeje Lalpekhlua chu khualzahawm a ni.

Lalrinpuii chuan, thlai leh eitur silfai te, tui thianghlim chauh in te, inthiarna leh a hmunhma thianghlim taka enkawl te, in leh a vel vawn fai leh ṭha taka bawlhhlawh sawngbawlte chu rulhut dona a nih thu a sawi a, "Tihtakzeta ṭan lâk thar a ṭul hle. Hnahthial District Hospital building changtlung tak, cheng nuai 1700 man sak thuai tura peihfel a ni tawh," a ti.

Hnahthial District Hospital-a thawkte chu fakawm a tih thu sawiin Minister chuan, "In hna hi mipui rawngbawlna a ni tih hre rengin in awmna hmun apiangah lungawi takin theihtawp chhuah ṭhin ang che u. South Tuipui bialin MLA chak tak in nei hi in vannei hle," a ti a, Hnahthial district-in hma a sawn zual zel theih nan mipuite thawhhona a ngen nghal.

Bialtu MLA Jeje Lalpekhlua pawhin thu sawiin, zirlai naupangte chu an hriselna ngaipawimawh turin a chah a, "Taksa tana hrisel lohna tam tak thlen theitu leh naupang ṭhanglaite ṭhan tiṭhu theitu chu rulhut a ni a, inkai darh awl tak a ni tih hriain rulhlut hlo ei hi ngaih pawimawh hle tur," a ti a; lehkha zir thlahthlam lo tur leh theihtawp chhuaha ṭang sauh sauh turin a fuih.

National Deworming Day-ah hian Hnahthial DEO/DPC Micky Lalenkawla chuan rulhut laka inven theih dan a sawi a; zirlai naupangte hnenah rulhut hlo (deworming tablet) sem nghal a ni.

February Round of NDD pual hian naupang kum 1-19 inkarte hnenah rulhut damdawi sem a ni a, February 16 (mop up day)-ah ei ve hman lote tan sem leh tur a ni. NDD hi kum tin February round leh August round-ah ṭhena hman ṭhin a ni.