
KHAWTHLIR
Thisen pe
February 10, Inrinni khan Ramhlun Vengchhak Branch KṬP chuan Synod Hospital, Durtlang blood bank tan thisen unit 24 an pe a, a petute hi mipa 19 leh hmeichhia paruk an ni. Inrinni vek khan Catholic Ṭhalai Pawl, Tachhip chuan Zoram Medical College tan thisen unit 21 an pe a, thisen hi mipa 15 leh hmeichhia parukin an pe.
Office hawng dawn
South Tuipui bialtu MLA Jeje Lalpekhlua chuan February 10, Inrinni khan a bial chhung Darzo, South Vanlaiphai, Muallianpui, Lungpuitlang leh New Kawnpuite a tlawh a, "Hnahthialah MLA office ka hawng ang a, complaint/suggestion box kan dah dawn," a ti a, South Tuipui bialin hmasawnna tluantling a neih theihna tura hma an lakna kawng hrang hrangah amah ṭawiawm zel turin a bial mipuite a sawm.
Sava bu dah
Champhai Nature Conservancy chuan February 10, Inrinni khan sava bu 18 an siam chu Champhai Zotlanga District Institute for Education and Training (DIET) compound chhungah an dah. Savate'n bu an chheh hun a lo thlen ṭan leh tak avangin savate'n awlsam zawka bu an chheh theih beiseiin heng sava bu lemte hi dah a ni. Sava bu turte hi GC Carpentry Works neitu Lalsangthanga'n 13, Champhai Forest RO-in pathum leh BICON-in pakhat an pe.
MJA-in tlawh
Mamit Distrit MJA member-te chuan February 10, Inrinni khan Mamit District Cooperative Department hnuaia hmalakna hrang hrangte an tlawh. Mamit MJA-te hian Darlakah Teirei phai oil palm ching tute oil palm herna tura an bunte, Darlak farmer-te siam kuhva nursery, Tuidam oil palm farmer-ten oil palm herna an buatsaih mekte, Kawrthah leh Rengdila Co -operative society ten an building sak mek te, Zamuang khuaa PACS leh Kuhva rah ur ro/pho rona hmun te, Zawlnuam hmuna Society ten sangha tin siamna tur an ruahmante leh Mamit Hmar Multipurpose Cooperative Society-ten vawikhat hman no leh thleng an siamna hmunte an tlawh.