MNYF-in Tlawng lei chim an enfiah

MNF ṭhalaite chuan thuchhuah siamin, Sihhmui leh Lengpui inkara Tlawng lei chim ta dawh ṭhat hna thawh mek dan April 6, 2016 khan an enfiah tih an tarlang.

Minister Lal Thanzara'n March 2016 chhunga dawh zawh tur anga a sawi laiin, dawh ṭhat hna thawh a la ni lo tih an sawi.

MNYF chuan, Tlawng lei chim dawh ṭhat tur April 6-a an tlawh lai hian lei dawh ṭhatna tur hmanrua a la rawn thleng lo tih an finfiah tih an sawi a, "Minister Pu Lal Thanzara'n March 2016 chhunga dawh zawh turin a lo sawi tawh a. Congress
ṭhalaite pawhin thuchhuah siamin March 2016 chhunga dawh zawh tur leh lei dawhna tur bungruate February 20, 2016 aṭanga Kolkata aṭanga thawn turin company biak fel a nih tawh thu thuchhuah an siam a ni," an ti.

MNYF chuan, Sihhmui Tlawng lei dawh zo tura sorkar a intiam hun chhung March thlaah pawh dawhna tur bungruate pakhatmah a la thleng lo chu mak an tih thu an sawi a ni.

Tlawng lei chu tun hnaiah ṭum thum - October 31, 2014, Decem-ber 8, 2014 leh December 2, 2015-ahte a chim tih sawiin, MNYF chuan, "Nunna hlu tak kan chân bakah lirthei leh bungruate'n an tuar nasa hle. India ram hmun dangah lei dawhtu company-te chungah sorkarin action la a, criminal case siamsakin police-te'n an man a ni," an ti a; Mizoramah chuan lei dawhtute hrem loin lei zawh chimtute thiam loh an chantir zawk hlauh ṭhin niin an sawi.