CM-in sorkar laipui hotute a dawr chhunzawm; Tuialhthei zawng chhunzawm vat turin a ngen

New Delhi-a cham mek chief minister Lalduhoma chuan February 11, Pathianni tlaiah khan Minister of State for Prime Minister's Office Dr Jitendra Singh chu a chenna-inah a kawm a; Pathianni vek khan Ministry of Petroleum & Natural Gas hnuaia Director General of Hydocarbons Dr Pallavi Jain Govil kawmin, Mizorama tuialhthei leh gas zawnchhuah hna chhunzawm dan tur a sawipui.

Lalduhoma chuan Prime Minister zin chhuah lai a nih avangin a aiawhtu Minister of State for Prime Minister's Office Dr Jitendra Singh hnenah hian Mizoram hmasawnna tur thil pawimawh hrang hrang a thlen a; PM-DevINE aṭanga sorkar laipuiin February 10, 2024-a cheng vbc 500 a rawn pek hmanga thawh tur 'Construction of Aizawl By-pass on western side' lungphum hawn dan turte an sawidun nghal.

Director General of Hydocarbons Dr Pallavi Jain Govil nen New Delhi Mizoram House-a an inkawmnaah chief minister Lalduhoma chuan Mizorama tuialhthei leh gas zawnchhuah hna chhunzawm dan tur a sawipui a ni.

Sorkar thuchhuah tarlan danin, Dr Pallavi Jain Govil hian Chief Minister hnenah Meidum bula tuialhthei awmna nia ngaih chu thawh chhunzawm vat tur leh Chief Minister pawh hmu vat turin ONGC-te lo hrilh a tiam a; Mizoram chhim lama tuialhthei zawn hna chhunzawm vat tur leh a khawihtu tur company ṭha lo zawng a, chu'ng company-te chu lo be fel turin Chief Minister hian a ngen nghal.

Tripura leh Aizawl inkara gas pipeline khawih hna muang lutuk chu chak zawka thawk tura hma la turin Chief Minister hian Director General of Hydocarbons hi a hrilh bawk.