Kolasib district-a bank-te CD Ratio 67.73%

Kolasib District Consultative Committee (DCC), District Level Security Committee (DLSC) leh District Level Review Committee (DLRC) chu an chairman John LT Sanga, bawrhsap kaihhruaiin nimin khan DC conference hall-ah an ṭhukhawm a; October - December 2023 chhunga Kolasib district-a bank-te CD Ratio chu 67.73% a ni.

John LT Sanga chuan sorkar hmalakna hrang hrang hlawhtlin nan bank lam leh department-te thawhhona ṭha a pawimawh thu a sawi a, "Mipuite'n bank kaltlanga dil theih scheme leh loan chi hrang hrang an hriatzau theih nan inzirtir tam a pawimawh," a ti a; financial literacy campaign (FLC) an neih ṭhin chu uar lehzuala kalpui turin banker-te a chah.

He huna tarlan a nih danin, financial inclusion plan hnuaiah Kolasib district-a mi 2,000 aia tlem chenna khaw 29-te chu mipuiin bank kaltlanga hamṭhatna hrang hrang an chhawr ve theih nan an khuaah bank branch emaw, business correspondent emaw, Indian Postal Payment Bank emaw dahkim a ni.

October - December 2023 inkar chhungin bank hrang hrang kaltlangin mipui hnena sum hman leh enkawl dan inzirtirna (financial literacy campaign) ṭum 19 buatsaih a ni a; mipuiin bank-a sum an dah luh (deposit) zat za zela bank-in mipuia sum an puktir (credit) zat chhûtna, Credit Deposit (CD) Ratio-ah Kolasib district-a bank-te October-December 2023 CD Ratio chu 67.73% a ni a; October-December 2022 aiin 12.06%-in a tam zawk.