Reiek Tourist Resort chei ṭhatah ACB-in thubuai an ziaklut

Reiek Tourist Resort cheiṭhatnaah sum hman leh hnathawh inmil lo a awm nia Lokayukta-in complaint an dawn kalzelah Anti Corruption Bureau (ACB) te chuan thubuai an ziaklut.

ZPM Ṭhalai chuan July 18, 2023 khan Reiek Tourist Resort chungchangah hian Lokayukta-ah complaint an thehlut a ni. Lokayukta chuan a concern department Tourism dept. hnenah August 1, 2023 khan lehkhathawnin zawhfiah ngai hrang hrangte a zawtfiah.

Tourism dept. chhanna chu Lokayukta chuan September 20, 2023 khan an dawng a, an zirchian hnuah ACB hnenah preliminary inquiry ti turin a hriattir. Preliminary inquiry report aṭangin chhuizui zel tlaka ngaih a nih avangin ACB-te chuan thubuai an ziaklut ta a ni.

Tarlan tawh angin ZPM Ṭhalai chuan, Reiek Tourist Resort tihhmasawnna atana sum ruahman nuai 680 chuang chu mi ṭhenkhatin sum siamna atan an hmang nia an hriat avang leh sum hman leh hnathawh danah dik lo a awma an hriat avangin chhui tura ngenna Lokayukta-ah an thehlut.

ZPM Ṭhalai chuan, cheng nuai 680 chuang sên a ni chungin hmasawnna tur thil thar hmuh tur a la awm fumfê lo niin an sawi a, "Sum ruahmante mahni hlâwkna atan leh mahni worker-te pawisa siamna atan maia hman nia a lang hi pawi kan ti hle. Thil dik lo titute hrem an nih ngei kan duh," an ti.