Kum 4 chhungin Lunglei district-ah lirtheia chetsualna a thleng tam ber

Lunglei Venglai Traffic Point-ah nimin zing dar 7:30 khan ‘Road Safety Month 2024 & No Tolerance Week’ hman a ni a, Lunglei South bialtu MLA Lalramliana Papuia'n a hawng. Mizoramah kum li chhungin Lunglei district-ah lirtheia chetsualna a thleng tam ber tih tarlan a ni.

He huna tarlan danin, Integrated Road Accident Database Mizoram-in a tarlan dan chuan Sept. 15, 2021 aṭanga February 2, 2024 chhungin Mizoramah lirthei chetsualna vawi 372 a thleng a, mi 130-in nunna an chan. Lirthei chetsual tamna ber chu Lunglei district (vawi 100) a ni a; Lunglei district-ah hian kum 2022 khan lirtheia chetsualna vangin mi pahnih leh kum 2023 khan mi pasarihin nunna an chan a ni.

January 1-December 29, 2023 chhungin Lunglei district-ah Tax & Vehicle Fees aṭangin DTO pisain Rs 1,99,59,517 a la lut a, lirthei chi hrang hrang 2,214 ziahluhthar niin, driving license 2,315, learner license 3,623 leh conductor license pahnih pekchhuah a ni.

Khuallian Lalramliana chuan, himna atan traffic dan zawm turin mipui a chah a, "Man chhuah hlauh vang chauha dan zawm kan nih chuan kan Motor Vehicle Act leh Traffic Rules-te hian awmzia a nei thui lo ang, dante hi keimahni himna atana zawm tura siam a ni a, duty awm lai chauha zawm kan nih chuan lirthei chetsualna vangin nunna hlu tak kan la inchan zel ang tih a hlauhawm hle," a ti.

District Transport officer Beitlotha Nohro kaih­hruaiin kalkhawmten Road Safety Month thu­tiam an sawirual a ni.