Sa-a intodelh turin ran chaw-ah intodelh a ngai - Vety Minister

ZPM chuan nimin khan an pisa-ah chhung inkhawm an hmang a, thusawitu AH & Vety minister C Lalsawivunga chuan sa-a intodelh turin ran chawah intodelh a ngaih thu a sawi.

C Lalsawivunga chuan saah Mizoram a intodelh loh thu sawiin, "Artui leh bawnghnuteah pawh kan la intodelh lo. Intodelh turin hmalakna tur pawimawh tak tak a awm a, a bikin ran chaw siamna kawngah hian hma kan lak hmasak a ngai hle. A bulṭhut aṭanga hmalak a nih loh chuan hlawhtlinna leh intodelhna tluantling a awm thei lo," a ti.

Mizoramah ran chaw siamna atana ṭangkai vaimim leh thlai dangte pawh a thar ṭha duh hle tih sawiin AH & Vety Minister chuan, "Chutih laiin vawiin thleng hian phai lam aṭangin ran chaw kan la chaw lut reng," a ti a, ran chawa intodelh chu hmalakna tur leh intodelh kawngah ke penna hmasa tur a nih thu a sawi.

C Lalsawivunga chuan Zoram mipuite'n ZPM sorkarah mipuiin rinna sang tak an nghat mek tih sawiin, "Kan ti beidawng thiang lo. Kan ram tan kan tih theih zawng zawng ti turin hma kan la mek," a ti.

Tun hnaiah social media hmang thiam lo an pung nasa tih sawiin C Lalsawivunga chuan, "Mipuite kan fimkhur a ngai hle. Social media hi mimal tin leh pawl dinhmun ti chhe vek thei leh chawikang dawrh thei a ni," a ti a, thu tling lo leh thu dik lo vawrhdarh nan social media hmang lo turin mipuite a chah.